दोस्रो चरणको राहत वितरण गर्दै सूर्यमणि अधिकारी स्मृति प्रतिष्ठान र पोखरा इन्जिनियर्स ग्रुप

२० जेठ, पोखरा । बिश्वब्यापी रुपमा फैलिएको कोरोना भाइरसको कारण मुलुक लकडाउनमा रहिरहेको बेला प्रा.डा. सूर्यमणि अधिकारी स्मृति प्रतिष्ठान र पोखरा इन्जिनियर्स ग्रुपको संयुक्त आयोजनामा पोखरा महानगरपालिका वडा न. १४ मनकामना टोलका ६० बिपन्न परिवारलाई मंगलवार दोस्रो चरणको राहत उपलब्ध गराइएको छ ।

मनकामना टोल , खाल्टे मसिना टोल र समितारा टोलका अति बिपन्न र कहि कतैबाट राहत नपाएकाहरुलाई राजनीति, जाति, धर्म, वर्ग र सम्प्रदाय भन्दामाथि उठेर राहत वितरण गरिएको हो । धेरै पटक धेरैले राहत थापेको देख्यौं तर हाम्रो नाम र पालो कहिल्यै आएन । हाम्रा कुरा सुनिदिने कोही छैन जस्तो लागेको थियो तर आज लकडाउनको ७१ औं दिनपछि पहिलो पटक घर टोलमै राहत आएकोमा खुशी लागेको एक लाभग्राहीले बताइन् ।

पोखरा इन्जिनियर्स ग्रुपका सल्लाहकार ई. धुव्र गर्बुजाले प्रा.डा. सूर्यमणि अधिकारी प्राविधिक भएकाले इन्जिनियरहरूले प्रकृतिको दोहन मात्रै होइन संरक्षण गर्नुपर्ने सन्देश दिए । उनले कोरोना भाइरसले हामीलाई हाम्रो संस्कार अवलम्बन गर्न पाठ सिकाएको छ भनेर प्रष्ट पारे ।

वृद्ध, अशक्त र सुत्केरी तथा राहात पाउन पर्ने व्यक्तिको खोजी मनोहर युवा क्लबका कोषाध्यक्ष शैलेश बानियाँ, मनकामना टोल बिकास संस्थाका अध्यक्ष रामचन्द्र केसी र मसिना टोल विकासका अध्यक्ष लक्षमण गुरुङले गरेका थिए । प्रतिष्ठानका संरक्षक कपिलनाथ कोइरालाको उपस्थित रहेको सो कार्यक्रममा पोखरा इन्जिनियर्स ग्रुपका ई.शक्ति बरुवालले कार्यक्रम संचालन गरेका थिए भने प्रतिष्ठानकी अध्यक्ष इन्दिरा अधिकारीले कोइरालाले सहभागी र सहयोगी सबैलाई धन्यवाद ज्ञापन गर्दै आउँदा दिन फेरि पनि अर्को चरणको राहत बितरण कार्यक्रम लिएर आउने बताइन् ।