पूर्वमा लकडाउनको अवज्ञा

२१ जेठ, विराटनगर । सरकारको अविबेकी निर्णयको अब अवज्ञा हुन थालेको छ । विकल्परहित बनाइएको लकडाउनले जनजीवन अस्तव्यस्त भएपछि पूर्वी नेपालको प्रदेश नं. १ को राजधानी विराटनगरसहित सुनसरी र झापामा सञ्चालित बैंकहरु आजबाट निर्वाध खुलेका छन् ।

सत्ता राजनीतिको अस्त्र बनाइएको लकडाउनले आर्थिक जीवन संकटग्रस्त भएको भन्दै विराटनगर महानगरपालिकाले नै खुकुलो बनाउने नीति लिएको हो । महानगरपालिका प्रमुख भीम पराजुलीले अब पनि लकडाउन लम्ब्याउँदा आर्थिक रुपले ठूलो नोक्शानी हुने ठहर गरी हामीले विस्तारै जनजीवन खुकुलो बनाउने नीति अख्तियार गरेका छौं भने । हिजोसम्म अल्टर्नेटिभमा खुुलेका बैंकका सबै शाखा आजबाट निर्वाध खोलिएको छ । तर स्वास्थलाई भने ख्याल गर्नुपर्ने मेयर पराजुलीले स्मरण गराए । कोरोनाविरुद्धको लडाईं अब व्यक्ति स्वयंले गर्नुपर्ने बुझिएपछि सावधानी अपनाएर आर्थिक गतिविधि गर्नुको विकल्प नभएको बताए ।

अहिले बैंक तथा वित्तिय संस्थाबाट यसको परीक्षण थालेका छौं, विस्तारै अन्य क्षेत्रलाई पनि खुकुलो बनाउने नीति रहेको छ– उनले भने । बैंक तथा वित्तिय संस्थाहरुले पनि सेवाग्राहीलाई सामाजिक दूरी कायम गरी सहयोग गर्न आग्रह गरेको छ । पूर्वी नेपालमा आर्थिक गतिविधि ठप्प हुँदा ठूलो नोक्सानी बेहोर्नुपरेको मोरङ उद्योग संघका अध्यक्ष भीम घिमिरेले पनि अब सबै क्षेत्र खोल्नुपर्ने बताएका छन् । यसरी लामो समय बस्ने अवस्था छैन भन्दै उनले कोरोनासँगको लडाईंलाई यथावत राख्दै आर्थिक गतिविधि बढाइनुपर्नेमा जोड दिए । सरकारले लकडाउनको मोडालिटी परिवर्तन गरेन भने दुर्घटना निम्तिन सक्ने चेतावनी दिंदै अब सावधानी अपनाएर जनजीवन खुकुलो बनाउनुपर्ने सुझाए ।