सप्तरी झड्पमा डेढ दर्जन घाइते, स्थिति नियन्त्रण गर्न आठ राउण्ड फायर

◊ धीरुभाइ

२१ जेठ, सप्तरी । सप्तरीको छिन्नमस्ता गाउँपालिका ७ हाटीमा जग्गा विबाद सम्बन्धी दुई पक्षबीच बुधबार ठूलो झडप हुँदा डेढ दर्जन स्थानीय घाइते भएको छ । झडप अनियन्त्रित हुदै जाँदा स्थितिलाई नियन्त्रणमा लिन प्रहरीले आठ राउण्ड हवाई फायर गरेको सप्तरी प्रहरीका प्रवक्ता प्रहरी नायब उपरीक्षक तिलक भारतीले बताए ।

घटनाको खबर लगतै सुरक्षाकर्मी पुगेकोले घटनालाई नियन्त्रणमा लिइसकेको र अहिले त्यहाँका अवस्था सामान्य भइसकेको उनले बताए । आक्रोशित समूहले घाइतेहरुलाई लिन घटनास्थल पुगेको एम्बुलेन्स र प्रहरीको भ्यानमाथि समेत ढुङ्गामुढा गरी क्षति गरेको छ । त्यहाँको स्थिति सामान्य भएपनि झडप पुनः दोहोरिन नदिन सुरक्षाकर्मी परिचालन गरिएको प्रवक्ता भारतीले जानकारी दिए ।

दुवै पक्षले एकअर्कामाथि घरेलु हतियारले आक्रमण गर्दा स्थानीय रामकुमार यादव, प्रितम यादव, विरेन्द्र यादव, योगेन्द्र यादव, मो. मालिक, नाजुक खातुन, जुवेदा खातुन, सिताराम यादव, राजेन्द्र मण्डल, सजन साह, सन्तोष यादव, मो. महबुल, अब्दुल सतार, विरेन्द्र प्रसाद यादव, रमण साह, मो. अर्जुन, मो. नईम, मो. ताहिर, इद्रिस मन्सुरी लगायतका मानिसहरु घाइते भएका छन् । घाइते सबैको राजविराज स्थित गजेन्द्रनारायण सिंह अस्पतालमा उपचार भइरहेको छ । अधिकाँशको टाउको, पिठ्यु, खुट्टासहित शरीरको विभिन्न भागमा चोट लागेको छ ।