गृहले भन्यो, कोरोना नियन्त्रणमा खटिएका स्वास्थ्यकर्मी कुट्नेलाई पक्राउ गर्नुस

२१ जेठ, काठमाडौं । अब कोरोना नियन्त्रणमा खटिएकालाई दुव्र्यवहार वा गालीगलौज गरे पक्राउ परिने भएको छ । पछिल्लो समय स्वास्थ्यकर्मीमाथि नै कुटपिटका घटनाब बढेपछि गृह मन्त्रालयले कोरोना नियन्त्रणमा खटिएकामाथि दुव्र्यवहार गर्नेलाई पक्राउ गर्न निर्देशन दिएको हो ।

बुधबार रौतहटमा एक चिकित्सक र दैलेखमा कर्मचारीमाथि हातपात भएको थियो । स्वास्थ्यकर्मी र राष्ट्रसेवक कर्मचारीमाथि कुटपिट र अभद्र व्यवहार गर्नेलाई कारबाही गर्न गृह मन्त्रालयले बुधबार ७७ जिल्लाका प्रमुख जिल्ला अधिकारीलाई निर्देशन दिएको हो ।

गृह मन्त्रालयका सह प्रवक्ता उमाकान्त अधिकारीले देशका विभिन्न ठाउँमा स्वास्थ्यकर्मीमाथिको आक्रमण रोक्न यस्तो निर्देशन दिएको बताए । कोरोना नियन्त्रणमा सबैभन्दा बढी जोखिम मोलेर सेवामा खटिएपनि उल्टै आक्रमण भएपछि सरकार कडा रुपमा प्रस्तुत भएको हो ।

डोटीमा स्वास्थ्यकर्मीमाथि आक्रमण गर्ने तीन जनालाई पक्राउ गरेर यो निर्देशनको पालना गर्न शुरु गरिएको उनले बताए । अब रौतहट र दैलेखमा पनि कुटपिट गर्नेलाई पक्राउ गर्ने तयारी भइहरेको सहप्रवक्ता अधिकारीले बताए ।