नेपालमा कोरोना संक्रमण भयावह रुपमा फैलदै, कुन जिल्लामा कति ?

२२ जेठ, काठमाडौं । आज बिहीबार मात्र थप ३३४ जनामा कोरोना भाइरस संक्रमण पुष्टि भएको छ भने एकजना कोरोना संक्रमितको मृत्युपछि मर्नेको संख्या १० पुगेको छ ।

आजको नियमित प्रेस ब्रिफिङमा स्वास्थ्य तथा जनसंख्या मन्त्रालयका प्रवक्ता डा. विकास देवकोटाले सो जानकारी दिएका हुन् । योसँगै नेपालमा कोरोना संक्रमितको कूल संख्या २६३४ पुगेको छ । आज मात्रै दैलेखमा ११३ जना र रौतहटमा ६५ जना संक्रमित थपिएका छन् । थपिएका संक्रमितमध्ये इशनाथ नगरपालिका ४६, गुजराका ८, गढीमाईका सात जना छन् भने चन्द्रपुर माधवनारायण, फतुवा विजयपुर नगरपालिका र दुर्गा भगवती गाउँपालिकाका एकएक जना छन् । उनीहरू सबै भारतबाट फर्किएर हाल क्वारेन्टाइनमा बसेका व्यक्तिहरू हुन् । उनीहरूमध्ये १०८ जना नारायण नगरपालिका र ७ नौमुले नगरपालिकाको क्वारेन्टाइनमा छन् ।

मन्त्रालयका अनुसार प्रादेशिक जनस्वास्थ्य प्रयोगशाला विराटनगरमा मोरङका १ जना, नारायणी अस्पताल बीरगंजमा पर्साका १ जना, बीपी कोइराला स्वास्थ्य विज्ञान प्रतिस्ठान विराटनगर झापाका ३ जना, ताप्लेजुङका १ जना, मोरङका १ जना र सप्तरीका १३ जना गरी १८ जना, हेटौडास्थित प्रादेशिक प्रयोगशालामा बाराका ७, सिन्धुलीका १ र रौतहटका १ गरी ९ जना, पोखरामा गरिएको परीक्षणमा म्याग्दीका १, बाग्लुङका १०, पर्वतका ४ र स्याङ्जाका १ जना गरी कुल १६ जना, सेती प्रादेशिक अस्पताल डोटीका ३ जना, भेरी अस्पताल बाँकेका ४२ जना, धुलिखेल अस्पतालमा कपिलवस्तुका १७ जना, राष्ट्रिय स्वास्थ्य विज्ञान प्रतिष्ठान दाङका १५ जना, कर्णाली स्वास्थ्य विज्ञान प्रतिस्ठान मुगुका १ र दैलेखका १ सय ५ जना गरी कुल १ सय ६ जना, कोशी अस्पतालमा झापाका २ जना र खोटाङका ३ जना गरि ५ जना, प्रादेशिक अस्पताल सुर्खेतमा दैलेखका ८ जना, र राष्ट्रिय जनस्वास्थ्य प्रयोगशाला टेकुमा बारामा ५ जना, धनुषाका ६ जना, कपिलवस्तुका १२ जना, महोत्तरीका ३ जना, रौतहटका ६४ जनामा संक्रमण देखिएको हो ।

जसमध्ये बाँकेका ४२ जनाको रिपोर्ट पोजेटिभ आएको छ । उनीहरू नेपालगञ्ज उपमहानगरपालिका र जानकी गाउँपालिकाका हुन् । उनीहरू १५ देखि ३५ वर्षका पुरुष हुन् । कपिलवस्तुमा २९ जना संक्रमित मध्ये १२ जना कृष्णनगरका १७ देखि ५२ वर्षका पुरुष हुन् । यस्तै, यशोधराको ओडरी मावि र जनता चेतना माविको क्वारेन्टाइनमा रहेका १२ जनामा पनि कोरोना संक्रमण पुष्टि भएको छ । उनीहरूमध्ये एक २६ वर्षीया महिला छन् भने ११ जना २१ देखि ४८ वर्षका पुरुष हुन् ।

दाङमा १५ जना संक्रमित मध्ये घोराही उपमहानगर तथा राजपुर, ब‌ंगलाचुली र बबई गाउँपालिकाका उनीहरूमध्ये एक २३ वर्षीया महिला हुन् भने अरू १६ देखि ३६ वर्षका पुरुष हुन्। सप्तरीका १३ जनामा राजविराज, हनुमानगर कंकालिनी, छिन्नमस्ता र शम्भुनाथ नगरपालिकाको क्वारेन्टाइनमा रहेका उनीहरू १७ देखि ४८ वर्षका पुरुष हुन् ।

बाराका १२ जना संक्रमित मध्ये ७ जना आदर्श कटुवाल हुन् । संक्रमितमध्ये एक ३० वर्षीया महिला हुन् भने अरू १३ देखि ३० वर्षका पुरुष छन् । यस्तै महानगढीमाई नगरपालिका, विश्रामपुर र सुवर्णपुर गाउँपालिकाका ५ जनामा संक्रमण पुष्टि भएको छ । धनुषाका छ जना संक्रमितमध्ये एकजना ३० वर्षीया महिला हुन् भने अरू ३३ देखि ३७ वर्ष उमेरका पुरुष छन् । महोत्तरीका भंगाह नगरपालिकाका ३ जनाको रिपोर्ट पनि पोजेटिभ आएको छ । उनीहरू १९ देखि ३६ वर्षका पुरुष हुन् ।

डोटीका ३ जनामा मध्ये दीपायल सिलगढी नगरपालिका र पूर्वचौकी गाउँपालिकाका हुन् । मोरङको सुन्दर हरैंचाका २४ वर्षीय पुरुष, पर्सा पोखरियाकी १५ वर्षीया किशोरी, सिन्धुलीको कमलामाई नगरपालिकाका २३ वर्षीय पुरुष तथा सुनसरी भोक्राहाको क्वारेन्टाइनमा रहेका ताप्लेजुङका ३५ वर्षीय पुरुष र मोरङका ३० वर्षीय पुरुषमा पनि कोरोना संक्रमण पुष्टि भएको हो । आजका कुल संक्रमित व्यक्तिहरुमा ३ सय १९ जना पुरुष र १५ जना महिला रहेका छन् ।

मन्त्रालयका अनुसार अहिलेसम्म कुल ८४ हजार १ सय ३४ पीसीआर टेस्ट र १ लाख २५ हजार ५ सय ६४ आरडीटी परीक्षण भएको छ । पछिल्लो २४ घण्टामा ३ हजार ८ सय ६७ पीसीआर परीक्षण र ५ हजार १ सय ८५ आरडीटी परीक्षण गरिएको छ ।

यसैबीच कोरोना भाइरसको संक्रमणबाट मृत्यु हुनेको संख्या १० पुगेको छ । प्रवक्ता देवकोटाले पाँच दिन अघि भारतबाट आएका पाल्पा जिल्ला पूर्वखोला गाउँपालिकाका एकजना पुरुसको तानसेनस्थित मिसन अस्पतालमा जेठ २० गते मृत्यु भएको र स्वाब परीक्षण गर्दा कोरोना पोजेटिभ देखिएको बताए ।

यस्तै थप १२ जना संक्रमित निको भएर घर फर्किएका छन् । यससँगै नेपालमा कोरोना जितेर घर फर्किनेको संख्या २९० पुगेको छ । सरकारले हाल विभिन्न स्थानका २१ प्रयोगशालाबाट परीक्षण गर्दै आएको छ ।