मनीषाको कोरोना रिपोर्ट नेगेटिभ

२३ जेठ, काठमाडौं । बलिउडकी चर्चित अभिनेत्री मनीषा कोइरालाको कोरोना भाइरस परीक्षण रिपोर्ट नेगेटिभ आएको छ । भारतको मुम्बैबाट केही दिनअघि मात्रै उनी स्थलमार्ग हुँदै नेपाल आएकी थिइन् । नेपालले भर्खरै मात्र लिपुलेक, कालापानी र लिम्पियाधुरा लगायत क्षेत्र राखेर नेपालको राजनीतिक नक्शा जारी गरेपछि मनिषाले ट्वीटमार्फत त्यसको समर्थन गरेपछि भारतीय मिडियाको तारो बनेकी थिइन् ।

भारतमासमेत लकडाउन रहेकाले उनी मातापितासहित मुम्बैमा अड्किएकी थिइन् । तर भारतमा लकडाउन खुकुलो बनाइएपछि उनी सपरिवार पटनासम्म हवाई जहाज र त्यहाँबाट स्थलमार्ग हुँदै भैरहवा नाका हुँदै नेपाल भित्रिएकी थिइन् ।

नेपाल आएपछि उनी काठमाडौंस्थित एउटा होटलमा सपरिवार सेल्फ कोरेण्टिनमा बसेकी छन् । यसैक्रममा कोइराला परिवारको पीसीआर गर्दा नेगेटिभ रिजल्ट आएको मनीषाले ट्वीटमार्फत जानकारी दिएकी छन् । नेगेटिभ रिपोर्ट आएपनि विश्व स्वास्थ संगठनको मापदण्ड बमोजिम १४ दिन क्वारेण्टिनमा बस्ने जानकारी उनले दिएकी छिन् ।