सुनको भाउ तोलाको ८७ हजार ४०० पुग्यो

२५ जेठ, काठमाडौं । आइतबारदेखि नेपाल सुनचाँदी व्यवसायी महासंघले सुन चाँदीको नयाँ भाउ तोकेको छ । जस अनुसार आजको लागि छापावाला सुनको मूल्य प्रतितोला ८७ हजार ४०० रुपैयाँ कायम गरिएको हाे । यसैगरी, तेजावी सुनको मूल्य प्रतितोला ८६ हजार ९६० रुपैयाँ निर्धारण गरिएको छ । चाँदीको मूल्य भने ९२५ रुपैयाँ रहेको छ । लकडाउनपछि आज पहिलोपटक सुन चाँदीको भाउ निर्धारण गरिएको छ ।

लकडाउन अघिको तुलनामा सुनको भाउ तोलामा १० हजार ४ सय रुपैयाँ महँगो भएको छ । भन्सार दर बढाइनु अनि लकडाउनमा विश्व बजारमा सुनको भाउ पनि वृद्धि भएकाले अहिले मूल्य यसरी चुलिएको व्यवसायीको भनाई छ । सरकारले गरेको लक डाउनका कारण चैत १० गतेपछि सुनको मूल्य निर्धारण गरेको थिएन । चैत १० मा भने छापावाला सुनको मूल्य प्रतितोला ७७ हजार र तेजावी सुनको भाउ प्रतितोला ७६ हजार ७ सय रुपैयाँ थियो ।

चाँदीको मूल्य भने प्रतितोला ७ सय २० रुपैयाँ थियो । सरकारले आगामी आर्थिक वर्ष २०७७–०७८ मार्फत सुनको भन्सार दर बढाएको छ । यसले पनि सुनको मूल्य बढाएको हो । सरकारले यसअघि प्रति १० ग्राम सुनमा ६ हजार ५ सय रुपैयाँका दरले लाग्दै आएको भन्सार महशुल बजेटमा २ हजार रुपैयाँले बढाएर ८ हजार ५ सय रुपैयाँ पुर्याइएको छ ।

एक तोला सुनमा ११.६६४ ग्राम सुन हुन्छ । जसअनुसार, तोलामा सुनको भाउ अब २३ सय ३२ रुपैयाँले महँगिएको छ । यस्तै, चाँदीमा प्रतिकिलो ७५ हजार रुपैयाँ लाग्ने भन्सार महशुल १० हजारले बढाएर ८५ हजार रुपैयाँ पु¥याइएको छ ।