आत्महत्या दुरुत्साहनको आरोप लागेका गल्याङका मेयर अधिकारी मलामी समेत गएनन् !

२६ जेठ स्याङ्जा । गल्याङ नगरपालिकाका स्वास्थ्य बिभाग प्रमुख लिलाबल्बभ भण्डारीको आत्महत्या दुरुत्साहनको आरोप लागेका गल्याङका मेयर भुपराज अधिकारी मलासी समेत गएनन् ।

मेयर अधिकारीले तनाव दिएका कारण भण्डारीको मृत्यु भएको भन्ने परिवारले आरोप लगाइरहेका बेला आज राम्दीघाटमा भएको अन्त्यष्टिमा मेयर अधिकारी मलामी समेत नगएका हुन् । गल्याङ नगरपालिकाको स्वास्थ्य क्षेत्रमा मेयर अधिकारीले गरेको अनियमितताको भार भण्डारीलाई बोकाएर तनाव दिने गरेको मृतक भण्डारीका परिवारले आरोप लगाएका छन् ।

चरम दवावपछि आत्महत्या गरेको भन्दै परिवारले मेयरमाथि आरोप लगाएपछि मेयर अधिकारी मलामी नगएका हुन् । नगरपालिकाका स्वास्थ्य प्रमुखको रहस्यमय मृत्यु  हुँदा समेत समवेदना दिन नगएपछि उनीमाथि थप आशँका गरिएको छ ।

हिजो बिहानदेखि सम्पर्कबिहिन बनेका गल्याङ नगरपालिका स्वास्थ्य प्रमुख साँझ करिब ४.३० बजे तिर घर नजिकै झुन्डिएको अवस्थामा फेला परेका थिए ।