कुखुराको खोरमा क्वारेन्टाइन, कर्तुत लुकाउन यस्तो षडयन्त्र !

२७ जेठ, स्याङ्जा । हरिनास गाउँपालिका वडा नम्बर ५ देउरालीमा कुखुराको खोरलाई क्वारेन्टाइन स्थलको रुपमा प्रयोग गरेको पाइएको छ । भारतको जयपुरबाट जेठ १८ गते नेपाल आएका बर्ष २० का एक व्यक्तिलाई उक्त खोरमा रखिएको हो । उक्त घटनाको सत्यतथ्य बाहिर आएपछि यसको चौतर्फी विरोध भएको थियो ।

स्थानीयको चौतर्फी विरोधपछि उनलाई अहिले खोर नजिकैको घरमा सारिएको छ । चौतर्फी विरोध भएपछि वडा अध्यक्ष डन्डबहादुर रानाले कर्तुुत लुकाउन सामाजिक सञ्जाल फेसबुकमार्फत गैरजिम्मेवार अभिव्यक्ति दिएका थिए । स्थानीयको विरोधपछि खोर नजिकैको घरमा सार्दै वडा अध्यक्ष स्वंयमले फोटो खिचेर सामाजिक सञ्जालमा गैरजिम्मेवार अभिव्यक्ति दिई गल्ती लुकाउन खोजेको स्थानीय युवाहरुले आरोप लगाएका छन् ।

वडाले सामान्य स्वास्थ्य परीक्षणका साथै मास्क समेत उपलब्ध नगराएको क्वारेन्टाइनमा बसेका व्यक्तिले गुनासो गरेका छन् । वडा अध्यक्षमार्फत सबै वडाहरुमा स्वास्थ्य सामग्री पठाइएको गाउँपालिका अध्यक्ष खीमनारायण मानन्धरले दावी गरेका छन् । तर गाउँपालिकाबाट उपलब्ध स्वास्थ्य सामग्री सम्बन्धित तहसम्म नपुगेको र दुरुपयोग भएको पाइएको छ ।