नेपालमा कोरोनाबाट मृत्यु हुनेको संख्या १६ पुग्यो

२९ जेठ, काठमाडौं । नेपालमा कोरोना भाइरसबाट मृत्यु हुनेको संख्या १६ पुगेको छ । अर्घाखाँचीको मालारानी गाउँपालिकाको क्वारेन्टाइनमा बिरामी परेर मृत्यु भएका व्यक्तिमा कोरोना संक्रमण पुष्टि भएसँगै कोरोनाबाट मृत्यु हुनेको संख्या १६ पुगेको हो ।

ब्याडापाटाको सार्वजनिक आधारभूत विद्यालयको क्वारेन्टाइनमा बिरामी परेका र बुटवलमा उपचार गराएर फर्किँदा बाटोमै मृत्यु भएका ५७ वर्षका व्यक्तिमा कोरोना पुष्टि भएको हो । उनको जेठ २३ गते नै स्वाब संकलन गरी परीक्षणका लागि प्रादेशिक जनस्वास्थ्य प्रयोगशाला भैरहवा पठाइएको थियो ।

जुन रिर्पोट आज मात्रै आएपछि कोरोना संक्रमण देखिएको हो । यसअघि कोरोनाबाट १५ जनाको मृत्यु भएको थियो । पछिल्लो १६ औँ व्यक्तिको मृत्युबारे स्वास्थ्य मन्त्रालयले पुष्टि गर्न बाँकी छ ।

नेपालमा अहिलेसम्म ४५ सय बढी संक्रमित हुँदा साढे ६ सय मानिस कोरोना जितेर घर फर्किएका छन । तर संक्रमित १६ जनाको भने ज्यान गएको छ ।