कोरोना सर्ने भन्दै बिरामीकाे उपचार नगर्ने चिकित्सक बर्खास्त

३० जेठ, रौतहट । कोरोना भाइरसको महामारीमा संक्रमण सर्ने भनेर जिम्मेवारीबाट पन्छिदै आएका एक चिकित्सकलाई शुक्रबार रौतहटको मौलापुर नगरपालिकाले बर्खास्त गरेको छ ।

मौलापुरको पतौरास्थित प्राथमिक स्वास्थ्य केन्द्रका मेडिकल अधिकृत डा. हरिशंकर प्रसादलाई जेठ २८ गतेबाट लागू हुने गरि सेवाबाट बर्खास्त गरिएको हाे ।  उक्त स्वास्थ्य केन्द्रमा दुईजना मेडिकल अधिकृत रहेका थिए । बर्खास्तमा परेका चिकित्सक हरिशंकर तीन महिनाअघि करारमा काम गर्दै आएका थिए ।

संक्रमण बढिरहेको बेला नगरपालिकाले निर्माण गरेको क्‍वारेन्टाइनहरुमा बसेकाहरुलाई जाँच गर्न कुनै चासो नदिएको र नगरपालिकामा स्वास्थ्यको अवस्था प्रति बेवास्ता गर्न थाले पछि सेवाबाट हटाइएको छ ।  यही असार मसान्तमा चिकित्सकको करारको अवधि सकिदै थियो । तर कार्यसम्पादन ठिक नभएपछि नगरपालिकाले एक महिना अघि नै हटाएको हो ।