ओलीको शैली र चरित्रमा सुधार नआए सरकार ढाल्ने चेतावनी : प्रवक्ता शर्मा

३० जेठ, काठमाडौं । नेपाली कांग्रेसले सरकारको शैली र चरित्रमा सुधार नआए सरकार बदल्ने स्वरले आकार लिन सक्ने चेतावनी दिएको छ । कांग्रेसले सरकारविरुद्ध स्वतःस्फूर्त देशका विभिन्न सहरहरुमा दिनप्रतिदिन हुँदै गएका आन्दोलनतर्फ इंगित गर्दै शैली र चरित्रमा सुधार नआए सरकार बदल्ने स्वरले आकार लिने चेतावनी दिएको हो ।

कांग्रेस प्रवक्ता विश्वप्रकाश शर्माले स्वतः स्फूर्त भइरहेको आन्दोलनको तस्बिर ट्विटरमा राख्दै लेखेका छन्, “परीक्षण सुस्ततादेखि कात्रोमा भ्रष्टाचारसम्मको प्रश्‍नले धैर्यको बाँध टुट्दैछ । सरकारले शैली र चरित्र नबदल्ने हो भने सरकार बदल्ने स्वरले आकार लिनेछ नै ।”

उनले प्रधानमन्त्री केपी शर्मा ओलीलाई आन्दोलनकारीमाथि कारबाही गर्ने चेतावनी नदिन पनि सुझाएका छन् । “आन्दोलन गर्नेलाई कारबाहीको चेतावनी होइन, आफैलाई प्रश्‍न गर्नोस् @Pm_Nepal,कोरोनाको डर मारेर किन कोही सडकमा निक्लन आतुर छ ? ”