यूएईबाट उद्धार गरिएकी महिलामा कोरोना, विमानमा आएका अरुलाई चिन्ता !

३० जेठ, काठमाडौं । युएईबाट उद्धार गरेर नेपाल आएकी एक महिलामा कोरोना देखिएको छ । युएईमा समस्यामा परेकाहरु १५७ जना नेपाली शुक्रबार एअर अरबियाको जी नाइन १७५१ चार्टर फ्लाइटबाट नेपाल आएका थिए ।

त्यही टोलीमा रहेकी २६ वर्षीया महिलामा कोरोना संक्रमण पुष्टि भएको हो । उनलाई पहिलो दिन खरीपाटी क्वारेन्टाइनमा राखिएको थियो । दोस्रो दिन २४ जेठमा मुलपानीको क्वारेन्टाइनमा सारियो । त्यहीँबाट पीसीआर विधिबाट परीक्षण गर्न नमुना संकलन गरिएको र रिपोर्ट पोजेटिभ आएको हो ।

कोरोना देखिएपछि पाटन अस्पतालको आइसोलेसनमा पठाइएको छ । उनीमा कोरोना देखिएपछि विमानमा रहेका अरु पनि संक्रमित रहेको आशंका गरिएको छ । यद्यपी यसका लागि स्वाब संकलन गरेर परीक्षण गर्न पठाउने सरकारको तयारी छ ।