कोरोना संक्रमित वालिङका चारजना निको भई घर फिर्ता

१ असार,स्याङ्जा । स्याङ्जामा पहिलो चरणका कोरोना संक्रमित चारजना निको भई घर फिर्ता भएका छन् । जेठ १३ र १४ गते पोखरास्थित स्वास्थ्य विज्ञान प्रतिष्ठानमा कोरोना परीक्षण गर्दा पोजेटिभ देखिएपछि जिल्ला अस्पतालको आईसोलेसन र कालिका सामुदायिक अस्पतालको आईसोलेसनमा उपचाररत चारजना निको भई घर फिर्ता भएका हुन् ।

घर फिर्ता हुनेहरुमा वालिङ नगरपालिका वडा नं. ७ र १३ का नागरिक हुन् । वालिङ ७ का २० र २९ वर्षीय पुरुष र वडा नं. १३ की ३९ वर्षीया महिला तथा २६ वर्षीय पुरुष निको भई घर फर्केका हुन् । वालिङ नगरपालिकाले जिल्ला अस्पताल तथा कालिका सामुदायिक अस्पतालको आईसोलेसनबाट निको भएका नागरिकहरुलाई वालिङमा ल्याएर पूष्पगुच्छासहित विदाई गरेको हो ।

निको भएर आएका नागरिकहरुलाई विदाई गर्दै नगर प्रमुख दीलिपप्रताप खाँण एवं उपप्रमुख कल्पना तिवारीले उच्च मनोबल, धैर्यता र आत्मबलका कारणले कोरोनामाथि सहज बिजय हासिल गर्न सफल भएकोमा बधाई दिदै अझै केही दिन होम क्वारेन्टाइनमा बस्न सुझाव दिए ।

वालिङ नगरपालिकाका २९ जना कोरोना संक्रमितमध्ये हालसम्म पाँचजना निको भई घर फिर्ता भएका छन् भने एकजना बृद्धको उपचारका क्रममा पोखरामा निधन भएको थियो । वालिङका २३ जना पुरुषहरु आईसोलेसनमा उपचाररत छन् ।स्याङ्जा जिल्लामा हालसम्म कोरोना संक्रमितको संख्या ६० पुगेको छ । यसअघि गल्याङ नगरपालिकाका दुई र वालिङ नगरपालिकाका एक जाना गरी हालसम्म सात जना निको भएर घर फिर्ता भएका छन् ।

एघार स्थानीय तह रहेको स्याङ्जाका विभिन्न पालिकामा निर्माण भएका क्वारेन्टाइनहरुमा आठ सय ८१ जना रहेका छन् । हालसम्म स्याङ्जामा नौ सय ५५ जनाको स्वाब परीक्षण गरिएको छ भने एक हजार चारसय ७४ जनाको आरडीटी परीक्षण गरिएको जिल्ला स्वास्थ्य कार्यालय स्याङ्जाका प्रमुख यामप्रसाद शर्माले जानकारी दिए ।