डा. दिव्यालाई आईओएमको डीन बनाइँदै

३ असार, काठमाडौं । प्रधानमन्त्री केपी शर्मा ओलीका निजी चिकित्सक डा. दिव्यासिंह शाह थोरै भाग्यमानी डाक्टरहरु मध्ये एक हुन् । अहिले नै राज्यमन्त्री सरहको सेवा सुविधा प्राप्त डा. शाहलाई ओलीले थप जिम्मेवारी दिने तयारी गरेका छन् ।

अब उनलाई त्रिभुवन विश्वविद्यालय चिकित्साशास्त्र अध्ययन संस्थान(आईओएम) को डीनमा नियुक्ति गर्ने अन्तिम तयारी सरकारले गरेको छ । यस प्रयोजनका लागि डा. प्रेमराज ज्ञवालीको संयोजकत्वमा गठित सर्च कमिटीले डा. दिव्याको नाम सिफारिश गरिसकेको छ । उनीसँग कमिटीले डा. प्रदीप वैद्य र डा. उत्तम श्रेष्ठको नाम समेत सरकार समक्ष सिफारिश गरेको छ ।

यो त केवल औपचारिकताका लागि मात्र हो भन्दै एकजना चिकित्सकले भने– अब बस्ने मन्त्रिपरिषद बैठकले डा. दिव्यालाई नै नियुक्त गर्ने छ । हुन पनि प्रधानमन्त्री ओलीको प्रियपात्र भएकै नाताले डा. दिव्याले उक्त पद पाउने भएकी हुन् । उनी भन्दा धेरै सिनियर डाक्टरहरु हुनुहुन्छ, तर नियुक्ति भने डा. दिव्याकै हुने हो– ती चिकित्सकले भने ।

गत जेठ पहिलो साता डिन जगदीशप्रसाद अग्रवाल सेवा निवृत्त भएपछि रिक्त उक्त पदका लागि डा. दिव्याले लबिङ गर्दै आएकी थिएन् । ओलीको प्रिय पात्र भएकै नाताले पाउने पदको गरिमा राख्न भने डा.दिव्यालाई सजिलो नभएको पनि ती चिकित्सकले दावी गरेका छन् ।