बर्दियामा आज एकै दिन २६ जनामा कोरोना संक्रमण

३ असार, बर्दिया । बर्दियाकाे बढैयाताल गाउँपालिकामा कोरोना संक्रमित थपिने क्रम बढेको हो । बाँकेको सिमानामा रहेको यो बर्दियाको गाउँपालिकामा बुधबार एकैपटक २६ जना काेराेना संक्रमित थपिएका हुन् ।

आरडीटी जाँच गरी घर फर्काइएका बर्दियाको बढैयाताल गाउँपालिका–१ र २ का २६ जनामा कोरोना संक्रमण भएको पुष्टि भएको छ । उनीहरुलाई जेठ २९ गते क्वारेन्टाइनबाट घर फर्काइएको थियो । जेठ ३१ गते स्वाब संकलन गरी नेपालगन्जस्थित भेरी अस्पतालको प्रयोगशालामा पीसीआर जाँच गर्दा उनीहरुमा बुधबार बिहान कोरोना संक्रमण भएको पुष्टि भएको हो ।

संक्रमितमध्ये एक जना स्वास्थ्य चौकी प्रमुख हुन् । उनी क्वारेन्टाइनमा बस्नेहरुको स्वास्थ्य अवस्था बुझ्न जाने गरेका थिए । संक्रमण पुष्टि भएका व्यक्तिहरु परिवारसँगै बस्दै आएका थिए । योसँगै कोरोना संक्रिमितको संख्या बढैयाताल गाउँपालिकामा ४२ पुगेको छ ।

बढैयातालको शारदा उमाविमा २५ सिटको आइसोलेसन बनाइएको थियो । तर बुधबार मात्रै एकैदिन २६ जना संक्रिमत देखिएपछि थप आइसोलेसन बनाउनका लागि चुनौती देखिएको छ । उक्त आइसोलेसनमा पहिला देखि नै १६ जना बस्दै आएका छन् ।