नागरिकता विधेयकमा सहमति जुटाउन सरकारले माग्यो समय

३ असार, काठमाडाैं । नेपाली कांग्रेसले पुरानै अडान लिएपछि सरकारले वैवाहिक अंगीकृत नागरिकता सम्बन्धी विधेयकमा सहमति जुटाउनका लागि समय मागेको छ। गृहमन्त्री रामबहादुर थापाले नागरिकतासम्बन्धी विधेयकमा राजनीतिक सहमतिका लागि समय मागेका हुन्।

सरकारले समय मागेपछि संसदको राज्य व्यवस्था समितिले सहमतिका लागि पाँच दिन समय दिएको छ। आउने आइतबारसम्ममा यसबारे सहमति जुटाउन समितिले सरकारलाई समय दिएको हो।

मंगलबारको बैठकमा नेपाली पुरुषसँग विवाह गरेर आउने विदेशी महिलालाई विवाह भएको सात वर्षपछि नागरिकता दिने प्रस्ताव पेश भएको थियो। त्यसमा सत्तापक्षका समिति सदस्यहरु सहमत भए पनि कांग्रेसले पार्टीमा छलफलका लागि समय मागेको थियो। तर बुधबार बिहान कांग्रेस शीर्ष नेताहरुले पुरानै व्यवस्थामा अडान लिन आफ्ना सांसदहरुलाई निर्देशन दिएको थिए।

सरकारले समय माग गरेपछि आजको बैठकमा विधेयक अघि बढ्न सकेन। सत्तारुढ नेपाल कम्युनिस्ट पार्टी (नेकपा) ले यसलाई समर्थन गरेको छ तर कांग्रेसले विरोध गरेको छ ।

समिति सभापति शशी श्रेष्ठले दुई वर्षदेखि समितिमा रोकिएको विधेयक अघि बढाउन सहमति जुटाउन ल्याउन भन्दै पाँच दिनको समय दिएकी छन् ।