आज ५८६ जनामा कोरोनाको पुष्टि, संक्रमितको संख्या ७ हजार नाघ्यो

३ असार, काठमाडौं । बुधबार पछिल्लो २४ घण्टाकाे अवधिमा ५ सय ८६ जना संक्रमित थपिएका छन्। यीसहित नेपालमा कुल काेराेना संक्रमित ७ हजार १७७ पुगेका छन् ।

स्वास्थ्य तथा जनसंख्या मन्त्रालयका प्रवक्ता जागेश्वर गौतमले दिएकाे जानकारी अनुसार आज थपिएका कोरोना संक्रमितको संख्या हालसम्मकै उच्च दरले वृद्धि भएको छ।

पछिल्लो २४ घण्टामा ९ जना पुरुष कोरोनामुक्त भएका छन्। प्रवक्ता गौतमका अनुसार हालसम्म १ हजार १ सय ६७ जना कोरोनामुक्त भई विभिन्न अस्पतालबाट डिस्चार्ज भएका छन्। जसमा महिला १ सय १२ र पुरुष १ हजार ५५ छन्।

स्वास्थ्य तथा जनसंख्या मन्त्रालयले कोरोना भाइरस संक्रमणका कारण थप एक जनाको मृत्यु भएको पुष्टि गरेको छ । बाँके बैजनाथ—६ की ४६ वर्षिया महिलाको कोरोनाका कारण मृत्यु भएको हो ।

मृगौला सम्बन्धी समस्याका कारण जेट ३० गते नेपालगञ्ज मेडकल कलेज शिक्षण अस्पतालमा भर्ना भएकी ती महिलाको असार १ गते साँझ मृत्यु भएको थियो ।  १ गते नै कोरोना परीक्षणका लागि उनको स्वाव संकलन गरिएपनि २ गते मात्रै रिपोर्ट आएको मन्त्रालयका प्रवक्ता डा.गौतमले बताए । योसँगै नेपालमा काेराेनाका कारण मृत्यु हुनेको संख्या २० पुगेको छ ।