असार १० गते नेकपाले बाेलायाे स्थायी कमिटी बैठक

३ असार, काठमाडौं । सत्तारुढ नेपाल कम्युनिस्ट पार्टी ‘नेकपा’ले अमेरिकी मिलेनियम च्यालेन्ज कर्पोरेसन ‘एमसीसी’बारे छलफल गर्न स्थायी कमिटी बैठक बोलाएकाे छ ।

प्रधानमन्त्री एवं अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच बुधबार भएको भेटमा पनि बैठक बोलाउने समझदारी भएपछि असार १० गते नेकपाले स्थायी कमिटी बैठक बाेलाएकाे हाे ।

यसअघि दुई पटक मिति तोकेर पनि स्थायी कमिटी बैठक स्थगित भएको थियो । पछिल्लो समय एमसीसीबारे छलफल गर्न बोलाइएको सचिवालय बैठक पनि स्थगित भएको थियो । तर एमसीसी सम्झौता असारभित्र संसदबाट अनुमोदन गर्नुपर्ने दबावका कारण नेकपा समस्यामा परेको छ ।

बैठकमा एमसीसीका साथै समग्र विषयमा छलफल हुने नेताहरुले बताएका छन् । सरकारले वैशाख दोस्रो साता राजनीतिक विभाजन गर्न सहज हुने अध्यादेश ल्याएपछि नेकपाका २० स्थायी कमिटी सदस्यले लिखित रुपमै बैठक माग गरेका थिए । चर्को विवादपछि सहमति जुटाएका सचिवालयका नेताहरुले वैशाख २५ गते बैठक बस्ने मिति पनि तोकेका थिए ।