कोरोनालाई जितेर ५२ जना संक्रमित घर फर्किए

◊ धीरुभाइ

३ असार, सप्तरी । उच्च मनोबलले कोराना हार्दै, बिजेताहरु घर फर्किदै गएको छ । सप्तरीमा एक महिनायता ५२ जना कोरोना संक्रमित निको भएर अस्पतालबाट डिस्चार्ज भइ घर फर्किसकेका छन । जिल्लाको पहिलो संक्रमितसहित हालसम्म ५२ जना निको भएको गजेन्द्र नारायण सिंह अस्पताल राजविराजले जनाएको छ ।

पछिल्लो पटक गत सोमबार (२ गते) राजविराज स्थित साईकृष्णा अस्पतालको आइसोलेसनमा भर्ना भएकाहरुमध्ये एक महिलासहित १३ जना निको भएर डिस्चार्ज भएका छन् । त्यसअघि जेठ २९ गते एकैदिन १७ जना कोरोनालाई जितेर अस्पतालबाट डिस्चार्ज भई घर फर्किएको स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए ।

कोभिड १९ बाट संक्रमित भई आइसोलेसनमा भर्ना भएकाहरुमध्ये कोरोना भाइरसलाई जितेर निको भई घर फर्किनेहरुमा बलान बिहुल गाउँपालिका वडा नम्बर २ कि रञ्जना कुमारी पासवान, ३ का शिवसुन्दर मण्डल, सुरुङ्गा नगरपालिकामा कार्यरत नेपाल प्रहरीका असई रामबाबु सिंह, बोदेवर्साइन नगरपालिका वडा नम्बर ९ का प्रदिप कुमार साह, वडा नम्बर ६ का विपिन कुमार साह, वडा नम्बर १ का धनेश्वर ठाकुर, वडा नम्बर ९ का श्रवण कुमार दास, वडा नम्बर ७ का युवराज सिंह, वडा नम्बर १ का रामसुन्दर यादव, छुतहरु राम, वडा नम्बर ६ का विजय कुमार सदा रहेको बताए ।

यसैगरी विष्णुपुर गाउँपालिका वडा नम्बर १ का मो. सागिर, खडक नगरपालिका वडा नम्बर ३ का अब्दुल कलाम, जगमानपुरका वीर शमशेर राउत, राजविराज नगरपालिका वडा नम्बर १० का रामअवतार यादव, गोसाई दास, राजेश दास र पंकज यादव लगायतका रहेका छन् । उनीहरुको स्वाब रिपोर्ट नेगेटिभ आएपछि डिस्चार्ज गरी घर पठाईएको हो ।

यस्तै जेठ २८ गते डाक्नेश्वरी वडा नम्बर ८ भुतहीका ३५ वर्षीय जसोलाल राम र वडा नम्बर ४ प्रवाहाका २२ वर्षीय रामकुमार मुखिया तथा बलान विहुल वडा नम्बर ४ मौवाहाका ३५ वर्षीय अमरनाथ मण्डलले कोरोनालाई पराजित गरी आइसोसनबाट डिस्चार्ज भएर घर फर्किसकेको स्वास्थ्य कार्यालयका निमित प्रमुख यादवले बताए ।

बैशाख २९ गते पहिलो संक्रमित आइसोलेसनमा भर्ना गरिएको थियो । पहिलो कोरोना संक्रमित डाक्नेश्वरी नगरपालिका ३ हटेलका १८ वर्षीय नसिम हुसेन १८ दिनको उपचार पछि गत जेठ २२ गते घर फर्किनु भएको थियो । गजेन्द्र नारायण सिंह अस्पतालका निमित मेडिकल सुपरिटेन्डेन्ट तथा कोभिड–१९ कोरोना भाइरस व्यवस्थापन समितिका संयोजक डा. रणजितकुमार झाले गजेन्द्रनारायण सिंह अस्पताल र साइकृष्णा अस्पताल समेत गरी हालसम्म १५० जना भर्ना भएकोमा अहिले ९८ जना उपचारको क्रममा रहेको बताए । कोरोना संक्रमितहरुमा संक्रमणको कुनै पनि लक्षण नरहेको र स्वास्थ्य सामान्य रहेको उनले बताए ।