आज राष्ट्रियसभाबाट संविधान संशोधन विधेयक पारित हुँदै

४ असार, काठमाडौं । राष्ट्रियसभाले बिहीबार संविधान संशोधन विधेयक पारित गर्दैछ । तल्लो सदन प्रतिनिधिसभाबाट जेठ ३१ गते सर्वसम्मतिका आधारमा पारित भएको विधेयकमाथि त्यसको भोलिपल्ट राष्ट्रियसभामा छलफल भएको थियो ।

राष्ट्रियसभाका सचिव राजेन्द्र फुयाँलले प्रतिनिधिसभाबाट सन्देशसहित प्राप्त ‘नेपालको संविधान ९दोस्रो संशोधन० विधेयक, २०७७’ टेबुल गरेपछि जेठ ३२ गते आइतबार राष्ट्रियसभाको दोस्रो बैठकमा विधेयकमाथि छलफल भएको थियो । सोही दिन नै सैद्धान्तिक छलफल सकेर संशोधनका लागि ७२ घण्टाको समय दिइएको थियो ।

७२ घण्टाको समय सकिएपछि राष्ट्रियसभाले बिहीबार विधेयक पारित गर्ने तयारी गरेको हो । राष्ट्रियसभामा पनि विधेयक दुई तिहाइ बहुमतले पारित गर्नुपर्ने संवैधानिक व्यवस्था छ । राष्ट्रियसभाको बैठक बिहीबार अपराहन्न चार बजे बस्ने छ ।

सरकारले लिपुलेक–लिम्पियाधुरासहितको भू–भाग समेटेर जारी गरेको नक्सा अनुसार निशान छाप परिवर्तन गर्नका लागि संविधान संशोधन विधेयक पेश भएको हो ।