बर्दियामा क्वारेन्टाइनबाट घर फर्किएकै दिन मृत्यु, कोरोना पुष्टि हुन बाँकी

५ असार, बर्दिया । बर्दिया जिल्लाको बारबर्दिया नगरपालिका–३ का ४५ वर्षीय एक व्यक्तिको क्वारेन्टाइनबाटै फर्किएकै दिन मृत्यु भएको छ । उनलाई आरडीटी परीक्षणमा एन्टिबडी नेगेटिभ आएपछि बिहीबार घर पठाइएको थियो ।

गत जेठ २२ गते काठमाडौंबाट घर फर्किएका उनलाई वडा नम्बर–३ खुरखुरे बाल विकास केन्द्रको क्वारेन्टाइनमा राखिएको थियो । १४ दिनसम्म स्थानीय क्वारेन्टाइनमा बसेपछि बिहीबार आरडिटी परीक्षण गरिएको थियो ।

स्थानीय स्वास्थ्य चौकीमा आरडीटी जाँचपछि घर फर्किएका व्यक्तिले रातिका समयमा श्वास लिन गाह्रो भइरहेको, टाउको र पेट दुखेको परिवारका सदस्यले बताएका छन्। स्वास्थ्य अवस्था बिग्रँदै गएपछि बर्दिया जिल्ला अस्पताल लैजाँदै गर्दा उनकाे बाटोमै मृत्यु भएको हाे ।

जिल्ला स्वास्थ्य कार्यालय बर्दियाका प्रमुख गोकर्ण गिरीले मृतकको पीसीआर परीक्षणका लागि स्वाब संकलन गरी नेपालगन्जस्थित भेरी अस्पताल पठाइएको छ ।