तिरहुतमा राहतदेखि विकासीय बजेटमा अनियमितताको आरोप

◊ धीरुभाइ

५, असार सप्तरी । सप्तरीको तिरहुत गाउँपालिकामा अनियमितता गरेको भन्दै वडा सदस्यसहित स्थानीयले भण्डाफोर कार्यक्रम गरेका छन् । सो गाउँपालिकाको वडा नम्बर २ का स्थानीयहरुले वडा अध्यक्ष जयप्रकाश यादवले राहत वितरणदेखि विभिन्न विकासीय योजनामा अनियमितता गरेको भन्दै भण्डाफोर सुरु गरेको हो ।

मैनाकडेरी स्थित वडा कार्यालय प्राङ्गणमा आयोजित भेलामा सहभागी स्थानीय बुद्धिजीवी, नागरिक समाज, युवा, महिला एवम् वडा सदस्यहरु समेतले वडा अध्यक्ष यादवले सम्पूर्ण विकासीय बजेट रकम दुरुपयोग गरेको आरोप लगाएका छन् । निर्वाचित भएदेखि अहिलेसम्म वडामा जनमुखि कार्यक्रमको नगर्नुको साथै गरेको कार्य पनि सन्तोषजनक नरहेको समाजसेवी तथा पूर्व प्रधानाध्यापक भरतप्रसाद यादवले बताए । विनियोजित बजेट र भए गरेका खर्चको सम्पूर्ण विवरण सार्वजनिक नगर्ने, नागरिक समाजलाई गुमराहा बनाई सूचना लुकाएर अनियमितता गरेको उनको आरोप छ ।

शिक्षा, स्वास्थ्य र कृषि लगायतमा भन्दा मठ मन्दिरमा बजेट केन्द्रित गरि अयिमितता गरेको भन्दै छानबिनको माग गरेको छ । वडा सदस्यहरुलाई समेत जानकारी नदिई गोप्य ढंगबाट उपभोक्ता समिति गठन गरेर काम गर्दै आएको एक वडा सदस्यले बताए । भेलाको आयोजना नै नगरी कागजी भरमा अध्यक्षले आफै काम गर्दै आएको वडा सदस्यद्वय सकुन्ती देवी साह र इन्द्र कुमारी खंगले बताए ।

कार्यालयमा कार्यक्रम र सोको लागत बजेटका बारेमा जानकारी लिन खोज्दा अध्यक्ष यादवले हप्काइ गालीगलोज समेत गर्ने गरेको सदस्यद्वयले बताए । आफूहरु पदमा रहेर पनि कार्यक्रमसहित विकासीय कार्यक्रम, उपभोक्ता समितिहरु समेतको थाहा नदिई काम भएको प्रति आपत्ती जनाउँर्दै जिल्ला प्रशासन कार्यालय र गाउँपालिका कार्यालयमा पटकपटक जानकारी गराउदा पनि कुनै पहल नभएको अर्का वडा सदस्य शतिसकुमार मिश्रले बताए ।

वडा अध्यक्ष यादवले कोभिड १९ को सक्रमणमा भएको लकडाउनमा नेपाल सरकारद्वारा वितरण गरिएको राहतमा समेत अनियमितता गरेका बताएका छन् । दैनिक ज्यालादारी विपन्न दलित गरिब सुकुम्बासीको राहत सम्पन्न, हुनेखाने तथा आफ्नो नातागोतालाई राहत वितरण गरेको उनीहरुको आरोप छ ।

गत बुधबार वडा कार्यालयमा अध्यक्षले बैठक डाकिएको थियो । कार्यालयमा अनुउपस्थित रहेका वडाअध्यक्षले भद्र भलादमी बुद्धिजिवी युवा तथा महिला लगायतका ठूलो संख्यामा भेला भएको थाहा पाएर बैठक नै स्थगित गरेको बताइएको छ । वडा सचिव बिरेन्द्रकुमार यादव समेत कार्यालयमा थिएन एक सहभागीले भने, जेठ ३२ गते सूचना टाँस गरी बोलाइएको बैठक निर्धारित समय भन्दा १ घण्टा अगाडि मात्र स्थगितको सूचना टाँस गरिएको थियो ।

बैठक स्थगित भएपछि आक्रोशित वडा सदस्य राजेन्द्रप्रसाद मरिक यादवको अध्यक्षतामा भण्डाफोर कार्यक्रम आयोजना गरिएको थियो । सो कार्यक्रममा समाजसेवी महानन्द झा, कुलानन्द झा, पूर्व इन्जिनियर योगेन्द्र मिश्र, प्रोफेसर त्रिभूवन यादव, डाक्टर देवलाल खंग लगायतले वडा अध्यक्षको काम कारबाहीले जनता मर्माहित भएको र यस्ता गतिविधिले विकासीय कार्य ओझेलमा पर्ने भन्दै सक्रिय रुपमा निगरानी बढाउनु पर्नेमा जोड दिएका थिए । यता सो सम्बन्धमा बुझ्न वडा अध्यक्ष जयप्रकाश यादवसँग पटक पटक सम्पर्क गर्न खोज्दा सम्पर्क हुन सकेन ।