आईओएम डिन नियुक्तिमा डा. केसीको विरोध, नियुक्ति सच्याउन माग

५ असार, काठमाडौं । डा. गोविन्द केसीले त्रिभुवन विश्वविद्यालयको चिकित्साशास्त्र अध्ययन संस्थान ‘आईओएम’ डिन नियुक्तिमा विरोध जनाएका छन् । केसीले भनेका छन्, त्रिविले बुधबार वरिष्ठता मिचेर डिनमा डा. दिव्या सिंहलाई नियुक्त गरेकामा केसीले विरोध जनाएका हुन् ।

वरिष्ठताकै आधारमा डिनलगायतका पदाधिकारीहरु नियुक्त हुनुपर्छ भनेर बारम्बार आन्दोलन गर्दा पनि प्रकिया मिचेको छ। वरिष्ठता मिचिँदा अहिले नै पार्टी कार्यकर्ताहरु आईओएमका विभिन्न पद हत्याउन मुसा दौडमा संलग्न भइसकेको भन्दै केसीले तीमध्ये सबैभन्दा अक्षम र संस्थालाई दोहन गर्न पल्केका कार्यकर्ताहरु अहिले पद पाउन नेता रिझाउन लागि परेको पनि बताए । ‘त्यसो हुँदा संस्था फेरि धराशायी हुने निश्चित छ’ केसीले विज्ञप्ति जारी गरी भनेका छन् ।’

डा. केसीले वरिष्ठताको आधारविना भएका नियुक्ति सच्याउन माग समेत गरेका छन्। विज्ञप्तिमा भनिएको छ, ‘त्यसो नभएमा यी सारा समस्याका जडका रुपमा रहेको ओली–प्रचण्ड मनपरीतन्त्र विरुद्ध कडाभन्दा कडा आन्दोलन गर्न बाध्य हुनेछौं ।’