कांग्रेस नेता पौडेलद्वारा स्वास्थ्य सामग्री सहयोग

५ असार दमौली । नेपाली कांग्रेसका केन्द्रीय सदस्य प्रदीप पौडेलले कोरोना सङ्क्रमितको उपचार भइरहेको शुक्लागण्डकी नगरपालिकास्थित जीपी कोइराला श्वासप्रश्वास उपचार केन्द्रलाई स्वास्थ्य सामग्री सहयोग गरेका छन् ।

जिल्लाको शुक्लागण्डकी नगरपालिका–५ बेलचौतारास्थित सो केन्द्रलाई उनले २० थान व्यक्तिगत सुरक्षा सामग्री (पीपीई) सहयोग गरेका हुन । केन्द्रीय सदस्य पौडेलले उपचार केन्द्रका निमित्त कार्यकारी निर्देशक डा.रामकुमार श्रेष्ठलाई उक्त सामग्री हस्तान्तरण गर्दै स्वास्थ्यकर्मीको हौसला बढाउन स्वास्थ्य सामग्री सहयोग गरेको बताए ।

केन्द्रका निमित्त कार्यकारी निर्देशक डा.श्रेष्ठले कोरोना सङ्क्रमितको उपचारमा खटिएका स्वास्थ्यकर्मीलाई यस्तो सहयोगले हौसला मिल्ने बताए । केन्द्रमा नौ जना कोरोना सङ्क्रमितको उपचार भइरहेको छ ।यसैगरी सङ्घीय सांसद कलिला खानले व्यास नगरपालिकास्थित क्वारेन्टाइनमा खटिएका स्वास्थ्यकर्मीका लागि विभिन्न स्वास्थ्य सामग्री सहयोग गरेका छन्  ।

सांसद खानले २० थान व्यक्तिगत सुरक्षा सामग्री (पीपीई), एक हजार सर्जिकल मास्क, ९५ थान एन–९५ मास्क, १० थान स्यानिटाइजर, १० थान चस्मा, ५०० थान पञ्जा सहयोग गरेका हुन । उनले उक्त सामग्री नगरपालिकाका उपप्रमुख मीरा जोशीलाई हस्तान्तरण गरेका छन् ।

यसैगरी सांसद खानले व्यास नगरपालिकाका विभिन्न क्वारेन्टाइनको अनुगमन गर्दै त्यहाँको वस्तुस्थितिको बारेमा जानकारी लिएका छन् । साथै उनले दमौली अस्पतालका लागि सात थान पीपीई, जिल्ला प्रशासन तनहुँका लागि चार थान पीपीई, मास्क, पञ्जालगायतका स्वास्थ्य सामग्री उपलब्ध गराएका छन् ।