अभिभावकलाई निजी बिद्यालयको शुल्क नर्तिन नेबिसंघको आव्हान

८ असार, काठमाडौं । नेपाल बिद्यार्थी संघले निजी बिद्यालयहरुलाई कुनैपनि शुल्क नतिर्न अभिभावकहरुलाई आव्हान गरेको छ । नेबिसंघका अध्यक्ष राजीव ढुङगानाले आज एक विज्ञप्ति जारी गर्दै शैक्षिक संस्था नखुलुन्जेलको अवधिभरको कुनैपनि प्रकारको शुल्क नतिर्न सम्पूर्ण अभिभावकहरुलाई अपिल गरेका छन् ।

निजी बिद्यालयका दुई संस्थाले प्याव्सन र नेशनल प्याब्सन नेपालद्वारा हिजो असार ७ गते जारी गरिएको संयूक्त अपिल प्रति नेबिसंघको गम्भिर ध्यानाकर्षण भएको भन्दै उक्त निर्णय फिर्ता लिन र सरकारले गम्भीरतापूर्वक समस्या समाधान गर्न तदारुकता देखाउन अध्यक्ष ढुङगानाले आग्रह गरेका छन् । विद्यार्थीका अभिभावकहरुसँग शैक्षिक संस्था बन्द रहेको अवधिको शुल्क असुल्ने कुरा नेबिसंघलाई कुनै हालतमा मान्य नहुने पनि उनले प्रष्ट पारेका छन् ।

त्यस्तै नेबिसंघका महामन्त्री यूवराज पाण्डेले विद्यालय नखुलुन्जेलसम्म विद्यार्थीसँग कुनैपनि शुल्क लिन नपाइने बताउँदै प्यावसन र नेशनल प्यावसनको शुल्क असुल्ने निर्णय तत्काल फिर्ता गर्न माग गरेका छन् । संस्थागत विद्यालयका मर्का र जायज समस्या समाधानका लागि सरकारले जवाफदेही बन्नु पर्ने बताउँदै महामन्त्री पाण्डेले शिक्षा मन्त्रालय लाचार छाँया भएर बस्न नहुने बताए ।

“विगत लामो समयदेखि नेपाली विद्यार्थीहरु लकडाउनका कारणले घरमै सिमित भएर बसेको सर्वविदितै छ । मुखमै आएका विभिन्न परीक्षाहरु स्थगित भएको मात्र हैन, विद्यालयहरु कहिलेदेखि सुचारु हुन्छन भन्ने अन्यौलता समेत रहेको र कोरोना संक्रमणका त्रासले मनोवैज्ञानिक रुपमा समेत त्रसित भएर बसेको यस अवस्थामा नेपाली विद्यार्थीहरुले तनाव, दवाव र त्रास एकसाथ झेलीरहेका छन् । यस्तो अवस्थामा विगत ३ महिनादेखि बन्द रहेको विद्यालयहरुले यस बीचको शुल्कहरु चुक्ता गर्न अभिभावकहरुलाई गरेको अपिल हास्याँस्पद र भत्सर्नायोग्य रहेको” नेबिसंघद्धारा जारी विज्ञप्तिमा उल्लेख गरिएको छ ।

विज्ञप्तिमा शिक्षा मन्त्रालयले विगत गत बैशाख २२ गते मन्त्रीस्तरियमा निर्णय गरी नेपाल सरकारबाट अर्काे निर्णय नभएसम्म कुनै पनि विद्यालयले कुनै पनि तह वा कक्षामा नयाँ भर्ना नगर्नु, नगराउनु र भर्नाका नाममा वा अनलाइन पठनपाठनका नाममा कुनै शुल्क लिने वा बैंक खातामा रकम जम्मा गर्न लाउने कार्य नगर्नु भनेर प्रष्ट निर्देशन गरेको अवस्थामा प्याब्सन र नेशनल प्याब्सनले कसरी यस्तो अपिल गरे ? भन्ने प्रश्न उठाइएको छ ।

प्याब्सन र नेशनल प्याब्सनले यसरी खुल्ला अपिल जारी गरेर अभिभावकहरुलाई शुल्क (बाँकी बक्यौता) बुझाउन भन्दा पनि शिक्षा मन्त्रालय र यो सरकार के हेरेर बसिरहेको छ ? आज नेपाली विद्यार्थीहरु अचम्भित भएर यो प्रश्न गरिरहेको सो विज्ञप्तिमा उल्लेख छ ।