टुर्गानद्वारा पर्यटक ऐनका लागि सरकारलाई सुझाव

८ असार, काठमाडौं । टुरिस्ट गाइड एशोसिएसन अफ नेपाल ‘टुर्गान’ले सरकारले ल्याउन लागेको नयाँ पर्यटन ऐनका लागि विभिन्न सुझाव दिएको छ । टुर्गानका अध्यक्ष केदार तामाङसहितका पदाधिकारीले आज संस्कृति, पर्यटन तथा नागरिक उड्डयन मन्त्री योगेशकुमार भट्टराईलाई भेटेर केही बुँदा संशोधनसहितको सुझाव पत्र बुझाएका छन् ।

छलफलको क्रममा रहेको पर्यटन विधेयकको दफा ३१ मा रहेको ‘नगर गाइड’ शब्द हटाई पर्वतीय पथप्रदर्शक, सांस्कृतिक पर्यटक पथप्रदर्शक, पदयात्रा पथप्रदर्शक, स्थानीय पथप्रदर्शक वा अन्य यस्तै वर्गीकरण गर्न, पर्यटक पथप्रदर्शकको नवीकरण गर्दा कुनै प्रकारको पुनर्ताजगी तालीम लिएको तथा टुर्गानको सिफारिस आवश्यक पर्ने व्यवस्थासहितको ऐन ल्याउन मन्त्री भट्टराईलाई सुझाव दिएको टुर्गानका अध्यक्ष तामाङले जानकारी दिए ।

विदेशी नागरिकले पथप्रदर्शकको रुपमा कार्य गर्न नपाउने कुरा स्पष्ट नभएको र उक्त विषय स्पष्ट हुने गरी यस्तो कार्य गरेमा रु एक लाखसम्म जरिवाना वा एक महिनासम्म कैद वा दुवै सजायको व्यवस्था गर्नुपर्ने तथा कुनै संस्थाले अनाधिकृत व्यक्तिलाई पथप्रदर्शकको काम लगाएमा रु ५० हजारसम्म जरिवाना गर्न सक्ने व्यवस्था गर्न सुझाव दिइएको छ । “मन्त्री भट्टराईले सुझावलाई सकारात्मक रुपमा लिएको छ, ऐनमा समावेश गर्ने आश्वासन दिएको छ”, तामाङले भने।

सो अवसरमा मन्त्री भट्टराईले व्यवसायीका आवश्यक सल्लाह र सुझावलाई समावेश गरी ऐनलाई व्यवसायमैत्री बनाउन आश्वासन दिएको टुर्गानका प्रमुख कार्यकारी अधिकृत शिव अधिकारीले बताए। “समयसापेक्ष ऐन निर्माण गरी पथप्रदर्शकको हकहित संरक्षण गरी पर्यटन क्षेत्रको विकासका लागि सुझाव दिएका छौँ”, उनले भने । सरकारले ४२ वर्षपछि नयाँ पर्यटन ऐन ल्याउन लागेको हो । विसं २०३५ मा ल्याइएको ऐन नै अहिलेसम्म कार्यान्वयनमा छ ।