चिनियाँ कम्युनिस्ट पार्टीले नेकपाको आन्तरिक विवाद मिलाउनु अपाच्य : कांग्रेस सांसद रिजाल

९ असार, काठमाडौं । नेपाली कांग्रेसका सांसद डा.मिनेन्द्र रिजालले चिनियाँ कम्युनिस्ट पार्टीका नेताले सत्तारुढ नेकपालाई प्रशिक्षण दिएकोमा आपत्ति जनाएका छन् ।

प्रतिनिधिसभाको मंगलबारको बैठकमा सांसद रिजालले विगतमा भारतसँगक विशिष्ट र कूटनीतिक सम्बन्धमा संवेदनशील हुन नसक्दा दुवै तर्फका नेता र दलहरू आलोचित हुन पुगेको भन्दै सत्तारुढ दलको ध्यानाकर्षण गराएका थिए । पछिल्लो समय चीनियाँ कम्युनिस्ट नेताहरू नेपालको सत्तारुढ दललाई प्रशिक्षण दिने र आन्तरिक झगडा मिलाउने काममा संलग्न हुनु ‘अपाच्य’ रहेको भन्दै त्यसतर्फ गम्भीर बन्न नेकपाको ध्यानाकर्षण गराएका थिए ।

केही दिन पहिले नेकपा र चिनियाँ कम्युनिस्ट पार्टीबीच भिडियो कन्फेरेन्समार्फत छलफल भएको थियो । उक्त विषयलाई लिएर प्रतिपक्षी कांग्रेसका सांसद रिजालले आलोचना गरेका हुन् ।

उने भने, ‘आगतमा उत्तरको छिमेकको दलको नेपालमा सत्तारुढ दललाई आन्तरिक प्रशिक्षण दिने र आन्तरिक झगडा र सत्ता सन्तुलन मिलाउनेमा लाग्ने काम उत्तिकै अपाच्य छ । यसमा सत्तारुढ दलको ध्यान जाओस् ।’