ओली र प्रचण्ड स्थायी कमिटी बैठकबारे सल्लाह गर्दै

 ९ असार, काठमाडौं । बुधबार भोलि असार १० मा डाकिएको नेकपा स्थायी कमिटी बैठकको अजेण्डा अझै तय भइसकेको छैन । बिना अजेण्डा बैठक गर्नुको औचित्य नहुने भन्दै नेकपका कार्यकारी अध्यक्ष पुष्पकमल दाहाल प्रचण्ड अहिले अर्का अध्यक्षसमेत रहेका प्रधानमन्त्री केपी ओलीसँग भेट्न बालुवाटार पुगेका छन् ।

दुबै नेताबीच अहिले भेट भइरहेको प्रधानमन्त्रीका प्रेस सल्लाहकार सूर्य थापाले पुष्टी गरेका छन् । भोलिका लागि बैठक डाकेको तर अजेण्डा भने तयार नभएको भन्दै असन्तुष्ट नेताहरुले दबाब दिएपछि प्रचण्ड बालुवाटार पुगेका हुन् ।खासगरी, अमेरिकी सहयोग मिलेनियम च्यालेञ्ज कर्पाेरेशन र सत्ता बाँडफाँटका विषयमा नै छलफल गरेर विवाद साम्य पार्ने ओलीको दाउ छ ।

यसका लागि प्रचण्डसमेत तयार छन् । तर स्थायी कमिटी सदस्यहरु भने बिना अजेण्डा बैठक बस्दा चाहिने भन्दा नचाहिने विषयमा बढी छलफल हुुने बताउँदैछन् । असन्तुष्ट नेताहरु माधवकुमार नेपाल र वामदेव गौतमलाई समेत फकाउने काम ओलीले भित्र भित्रै गरिरहेको बुझिएको छ । तर अहिले नै सहमति भने भइनसकेको सूत्रको दावी छ ।

भोलिको बैठकमा ओलीले नयाँ नक्शा र नागरिकतासम्वन्धी कानूनमा गरिएको संशोधनको विषयलाई उपलव्धिका रुपमा उठाउने तयारी गरेका छन् । यसले विषयवस्तु नै अर्कातिर डाइभर्ट हुने ओली पक्षको बुझाई छ । तर असन्तुष्ट पक्षले भने एक व्यक्ति एक पद र एमसीसी प्रकरणमा ओलीलाई ¥याख¥याखी पार्ने रणनीति बनाएका छन् ।

जस्तो सुकै अवस्थाको सामना गर्ने तयारीमा रहेको ओली पक्षले सबै विवाद सत्ता साझेदारीमै टुंगिने दावी गरेको छ ।यसका लागि अनौपचारिक रुपमा अध्यक्ष प्रचण्ड र नेता नेपालसँग सम्बाद भइरहेको थाहा भएको छ । साथै, उपाध्यक्ष बामदेव गौतमलाई समेत शक्ति केन्द्रका रुपमा व्याबहार गर्ने रणनीति बनाइएको छ– बालुवाटार निकट स्रोतको भनाई छ । भोलिको बैठकले ठूलै हंगामा खडा गर्छ भन्ने हौवा मात्र भएको उनको दावी छ । सबै कुरा मिलिसकेको छ, असन्तुष्ट पक्षको मनोभावनालाई संवोधन गर्न मात्रै बैठक बस्ने हो – उनले भनेका छन् ।