तिलाठी कोइलाडीको सभामा साढे ३८ करोडको बजेट प्रस्तुत

◊ धीरुभाइ

१० असार, सप्तरी । सप्तरीको तिलाठी कोइलाडी गाउँपालिकाको बुधबार गाउँ सभा आयोजना गरिएको छ । सो सभामा अगामी आर्थिक वर्ष ०७७/०७८ को कुल बजेट ३८ करोड ५३ लाख २४ हजार ५६० रुपैयाँ अनुमानित आयव्य प्रस्तुत गरेको छ ।

गाउँपालिका अध्यक्ष सतिशकुमार सिंहको अध्यक्षतामा आयोजित सभामा प्रस्तुत कुल बजेटको चालु तर्फ २३ करोड १२ लाख २४ हजार ५६० रुपैयाँ र पूँजिगत तर्फ १५ करोड ४१ लाख रुपैयाँ रहेको छ । तिलाठी कोइलाडी गाउँपालिकाको कुल आन्तरिक आम्दानी ४० लाख रुपैयाँ प्रस्ताव गरिएको छ ।

कूल बजेटमा संघीयबाट प्राप्त हुने वित्तिय समानिकरणतर्फ ११ करोड ५२ लाख र सशर्त अनुदानतर्फ १७ करोड, राजस्व बाँडफाँडबाट छ करोड ७४ लाख ९४ हजार ५६० रुपैयाँ, प्रदेश सरकारबाट प्राप्त हुने वित्तिय समानिकरण तर्फ ७१ लाख ५६ हजार, राजस्व बाँडफाँडबाट ३४ लाख ७४ हजार, सशर्त अनुदानतर्फ ८० लाख, विशेष अनुदानतर्फ ३० लाख र समपुरक अनुदानतर्फ २० लाख तथा युनिसेफबाट ५० लाख रुपैयाँ आय प्राप्त हुने उल्लेख छ । गाउँपालिकाको आठ वटै वडाहरुलाई आगामी आर्थिक बर्षको लागि वडा सिलिङ अन्तर्गत रु. ६५ लाख तोकिएको छ ।

आर्थिक, सामाजिक, कृषि र पूर्वाधार : सुशासन र ब्यवहार परिवर्तन विकासको मूल आधार भन्ने नारालाई आत्मसात गर्दै आयोजित सभामा प्रस्तुत नीति तथा कार्यक्रममा कोभिड १९ को भयावह अवस्थामा स्वास्थ्य, शिक्षा, रोजगार, कृषि र विपद् ब्यवस्थापन क्षेत्रलाई प्राथमिकतामा राखिएको छ ।

त्यस्तै कृषि क्षेत्रको विकासको लागि कृषि प्रविधि, ब्यवसायिक तथा सामुहिक खेती, सिंचाई सुविधाको विकास र विस्तार गरी कृषिलाई ब्यवसायिकरण गरिने, विपद् प्रभावित गाउँपालिकालाई विपद्को जोखिमबाट मुक्त गर्न कार्यक्रम सञ्चालन गरिने प्राथमिकतामा परेको छ ।