एमसीसीका विषयमा संसदीय समितिमा छलफल गर्नुपर्ने कांग्रेसको माग

११ असार, काठमाडौं । विवादास्पद अमेरिकी सहयोग सम्बन्धी परियोजना मिलेनियम च्यालेन्ज कोअर्पोरेसन एमसीसी सम्झौताबारे संसदीय समितिमा छलफल चलाउन प्रमुख प्रतिपक्षी दल नेपाली कांग्रेसले माग गरेको छ ।

प्रतिनिधिसभाको अन्तर्राष्ट्रिय सम्बन्ध समितिको बैठकमा कांग्रेस सांसदहरुले एमसीसी सम्झौताबारे सार्वजनिक रुपमा बहस भइरहेको भन्दै संसदीय समितिमा छलफल चलाउन माग गरेका हुन् ।

कांग्रेसले एमसीसी पारित गर्न माग गरेपनि नेकपाभित्रै विवाद छ । यो विवादले नेकपाको स्थायी कमिटी बैठकमा समेत ठाउँ पाएको छ । जहाँ छलफल र ठोस निर्णय हुन बाँकी छ । यस्तो बेला कांग्रेसले संसदीय समितिमा छलफल चलाउन माग गरेको छ ।

कांग्रेस सांसद पुष्पा भुसाल, उमा रेग्मी लगायतका सांसदले एमसीसीबारे विभिन्न भ्रम छरिएको भन्दै यसबारे संसदीय समितिमै छलफल हुनुपर्ने माग गरेका हुन ।

कांग्रेसका अर्का सांसद दिव्यमणि राजभण्डारीले एमसीसीबारे परराष्ट्रमन्त्रीको धारणा माग गरे । सांसदका मागको विषयमा जवाफ दिदै समिति सभापति पवित्रा निरौला खरेलले यस विषयमा छलफल बहस गर्न सकिने बताइन ।