आज विदेशमा अलपत्र १२ सय नेपाली आउँदै

१२ असार, काठमाडौं । विदेशमा अलपत्र एक हजार दुई सय नेपाली शुक्रबार काठमाडौं आउँदैछन् । आज आउन लागेका बहराइन, युएई, कुवेत र मलेसियामा समस्यामा परेका नेपाली हुन् ।

क्राइसिस म्यानेजमेन्ट सेन्टर ‘सीसीएमसी’ का एक अधिकृतका अनुसार कुवेतबाहेक सबै मुलुकबाट आज दुई र दुई वटा उडान हुँदैछन् । बहराइनको दुवै र मलेसियाको एउटा उडान नेपाल एयरलाइन्सको जहाजमार्फत हुँदैछ ।

युएईको हिमालयन र एयर अरेविया, कुवेतको जजिरा एयरलाइन्स र मलेसियाको एउटा उडान हिमालय एयरलाइन्सबाट हुँदैछ । उनीहरुलाई नेपाल ल्याएर काठमाडौं, भक्तपुर र ललितपुरमा राखिएका होल्डिङ सेन्टरमा लगिनेछ ।

नेपाली सेनाको स्वास्थ्य व्यवस्थापनमा उनीहरुको सामान्य स्वाथ्य जाँच र विवरण लिने कार्य हुनेछ । त्यसपछि सम्बन्धित प्रदेशमा क्वारेन्टाइनमा बस्न पठाउने तयारी छ ।

विदेशबाट आउने नागरिकले पीसीआर रिपोर्ट ल्याएको खण्डमा उनीहरु सिधै होम क्वारेन्टाइनमा बस्न पाउनेछन् । आफै खर्चको व्यवस्था गर्न सक्ने इच्छुक भने होटल क्वारेन्टाइनमा पनि बस्न सक्ने छन् ।