तीन पटक पत्र पठाउँदा पनि भारतले जवाफ दिएन : मन्त्री ज्ञवाली

१२ असार, काठमाडौं । भारतसँगको सीमा विवाद चर्किदा पनि वार्ताका लागि कुनै ठोस उपलब्धी नभएको परराष्ट्रमन्त्री प्रदीपकुमार ज्ञवालीले बताएका छन । नेकपाको स्थायी समिति बैठकमा बोल्दै मन्त्री ज्ञवालीले सीमा विवाद समाधानका लागि भारतलाई तीन पटक पत्र पठाएपनि अहिलेसम्म कुनै जवाफ नआएको बताएका हुन ।

सीमा विवाद वार्ताका माध्यमबाट समाधान गर्नुको विकल्प नभएको मन्त्री ज्ञवालीको भनाई छ । मन्त्री ज्ञवालीले अतिक्रमित भूमि फिर्ता ल्याउन भारतसँग जुनसुकै वार्तामा बस्न पनि नेपाल सरकार तयार रहेकोबारे औपचारिक अनौपचारिक सन्देश पठाइएको पनि जानकारी दिए ।

भूमि फिर्ता नहुँदासम्म वार्ताको पहल जारी राख्ने र ढिलै भएपनि भारत वार्तामा बस्ने मन्त्री ज्ञवालीको विश्वास छ ।सरकारले अतिक्रमित भूमि नेपालमै रहेको नक्सा जारी गरेर संसदबाट पारित गरिसकेको छ ।