बामदेवलाई न्याय चाहियो

१३ असार, काठमाडौं । सत्तारुढ नेपाल कम्युनिस्ट पार्टी ‘नेकपा’ उपाध्यक्ष वामदेव गौतमले विगतमा आफूमाथि अन्याय भएको भन्दै न्यायको माग गरेका छन्।  प्रधानमन्त्री निवास बालुवाटार जारी स्थायी समितिको जारी बैठकमा शनिबार बोल्दै उपाध्यक्ष गौतमले महाकाली सन्धिमा गल्ती भएको र त्यो कुरा उठाउँदा आफूलाई कारबाही भएको भन्दै न्याय माग गरेका हुन्।

सन्धि राष्ट्रको हितमा छैन भन्दा तत्कालीन एमालेबाट निस्कासन हुनुपरेको भन्दै गौतमले नेतृत्वले गल्ती भएको स्वीकार गर्नुपर्ने बताएका हुन। उनले भने, ‘सुरुवातमा मैले समर्थन गरेको थिएँ। बुझ्दै जादाँ गलत रहेछ भनेर विपक्षमा उभिँदा पार्टीबाट निस्कासन हुनुपर्‍यो। पार्टीले त्यतिबेला कारबाही गरेर गल्ती भएको रहेछ भनिदिनुपर्‍यो ।’

नेपाल र भारतबीच २०५२ माघमा उक्त सन्धि भएको थियो। सरकारको नेतृत्व हालका कांग्रेस सभापति शेरबहादुर देउवाले गरेका थिए। तत्कालीन एमालेको कमाण्ड माधवकुमार नेपालले सम्हालेका थिए। वर्तमान प्रधानमन्त्री केपी शर्मा ओली पनि सन्धिका समर्थक थिए।

स्थायी समितिमा उपाध्यक्ष गौतमले लिम्पियाधुरासहितको नक्सा जारी गर्ने सरकारको कमदलाई समर्थन गरे। शनिबार २१ स्थायी समिति सदस्यले सीमा समस्याका विषयमा धारणा राखेका छन्।