मलाई प्रधानमन्त्रीबाट हटाउन भारतले चलखेल गरिरहेको छ : ओली

१४ असार, काठमाडौँ । प्रधानमन्त्री केपी शर्मा ओलीले आफूलाई पदबाट हटाउने खेल भारतले खेलेको आरोप लगाएका छन । मदन भण्डारीको ६९ औं जन्मजयन्तीको अवसरमा बालुवाटारमा आयोजित कार्यक्रममा बोल्दै प्रधानमन्त्री ओलीले आफूलाई पदबाट हटाउन भारतले चलखेल शुरु गरेको बताएका हुन ।

काठमाडौँका होटलमा आफूलाई हटाउने बैठक भैरहेका र त्यसमा दुतावास सक्रिय रहेको प्रधानमन्त्री ओलीको आरोप छ । तर कसैले चाहेर पनि आफूलाई हटाउन नसक्ने उनको भनाई छ ।

भारतद्वारा अतिक्रमित नेपाली भूमि समेटेर नक्सा छापेपछि आफूविरुद्ध षड्यन्त्र भएको उनको दाबी छ । उनले आजका लागि नभई भोलिका लागि पनि आफू प्रधानमन्त्रीको जिम्मेवारीमा रहनुपर्ने बताए ।

ओलीले नक्सा छापेबापत कसैले प्रधानमन्त्रीलाई हटाउँछु भनेर सोचेको भए पनि नेपालको राष्ट्रियता कमजोर नभएको दाबी गरे । प्रधानमन्त्री ओलीले आफूलाई प्रधानमन्त्रीको जिम्मेवारीमा बस्न मन नभए पनि अहिले हटिँदिदा आगामी दिनमा नेपालको पक्षमा बोल्दा अर्को प्रधानमन्त्री हट्नुपर्ने अवस्था आउने बताए ।

पछिल्लो समय नेकपाभित्रै ओलीको आलोचना बढ्दै जाँदा ओलीको विकल्पका विषयमा विदेशी दुतावासमा पनि चाँसो बढेको छ ।

ु