सलह मारेर ल्याउनेलाई प्रति किलो २५ रुपैयाँ

१४ असार, कैलाली । सलह मारेर ल्याउने व्यक्तिलाई प्रति किलो २५ रुपैयाँ सुदूरपश्चिम प्रदेश सरकारले दिने निर्णय गरेको छ । भूमि व्यवस्था कृषि तथा सहकारी मन्त्रालयका प्रवक्ता खगेन्द्र प्रसाद शर्माले आइतबार यस्तो निर्णय गरिएको जानकारी दिए ।

पूर्व पर्साबाट नेपाल छिरेको सलह अहिलेसम्म सुदूरपश्चिम प्रदेशमा प्रभाव परेको छैन यदि त्यो आएमा मारेर ल्याउनेलाई प्रति किलो २५ रुपैयाँ दिने निर्णय प्रदेश सरकारले गरेको हो । मन्त्रालयले कृषि विकास निर्देशनालयको नेतृत्वमा तीव्र उद्धार समिति समेत गठन गरेको छ । उक्त समितिको सिफारिसमा सलह मारेर ल्याएमा प्रति किलो २५ रुपैयाँ दिने निर्णय भएको छ ।

आइतबार नै सुदूरपश्चिम प्रदेशका ८८ वटै स्थानीय तहलाई रकम उपलब्ध गराउन निर्देशन गराइने प्रवक्ता शर्माले बताए । सलह किरा मारेर स्थानीय तहको कृषि शाखामा उपलब्ध गराए उक्त स्थानीय तहले रकम उपलब्ध गराउने जनाइएको छ । यसअघि प्रदेश ५ ले पनि एक किलो सलह समाते २० रुपैयाँ दिने निर्णय गरेको थियो ।