आजबाट शेयर बजार खुला, ११ बजेदेखि ३ बजेसम्म कारोबार हुने

१५ असार, काठमाडौं । नेपाल स्टक एक्सचेन्जले सोमबार ‘आज’बाटदेखि शेयर बजार खुला गरेकाे छ । नेप्सेले बिहान ११ बजेदेखि दिउँसो ३ बजेसम्म ‘४ घन्टा’ शेयर कारोबार खुला गर्ने भएकाे हाे ।

यसअघि समय थपेर दैनिक ५ घन्टा बनाइएकामा नेप्से त्यसलाई १ घन्टा घटाएर ४ घन्टा बनाएको हो । तर सर्किट ब्रेकर, मूल्य परिवर्तन सीमा भने लक डाउन सुरु हुनु अघि अर्थात चैत १० गतेभन्दा अघि कै नियमित व्यवस्था अनुसार हुनेछ । सेयर बजार खुला गर्न धितोपत्र बोर्डले निर्देशन दिएपछि नेप्सेले सोही अनुसार निर्णय गरेको हो ।

लगानीकर्ताको शेयर खाताको शेयर ट्रान्सफर र रकम ट्रान्सफर गर्दा विद्युतीयमाध्यमको प्रयोग गर्न प्रोत्साहित गरिएको बोर्डको भनाइ छ । बजारमा संलग्न हुने लगानीकर्ता, ब्रोकर, नेप्से, सिडिएसी, मर्चेन्ट बैंकरले यसअघि जारी गरिएको कोभिड– १९ सुरक्षाका उपाय पालना गरी कारोबार गर्नुपर्नेछ ।

लगानीकर्ताले हालसम्म गरिएका व्यवस्थाबमोजिम नै घरैबाट कारोबार गर्नसक्ने व्यवस्था गरिएको हुँदा ब्रोकरसँग सम्पर्क गरी सकेसम्म घरैमा बसी कारोवार गर्न प्रोत्साहित गरिएको बोर्डले जनाएको छ ।