असार २० गतेभित्र एसईई विद्यार्थीको नम्बर पठाउन परीक्षा बोर्डको निर्देशन

१६ असार, काठमाडौँ । कोरोनाका कारण रोकिएको एसईई परीक्षाको आन्तरिक मूल्यांकन नम्बर राष्ट्रिय परीक्षा बोर्डले तत्कालै पठाउन निर्देशन दिएको छ । शैक्षिक सत्र २०७६ को माध्यमिक शिक्षा परीक्षा एसइईका विद्यार्थीको मूल्यांकन नम्बर असार २० गतेभित्र पठाइसक्न बोर्डले निर्देशन दिएको हो ।

विद्यार्थी मूल्यांकन नजिता प्रकाशन तथा प्रमाणीकरण कार्यविधि २०७७ को अनुसूची २ मा भएको समष्टिगत फाराम मात्र प्रयोग गरी विद्यार्थीको अन्तिम मूल्यांकन विवरण तयार गर्न बोर्डले विद्यालयहरूलाई आग्रह गरेको छ।

यो कार्यविधिमा टेकेर विद्यालयले प्रधानाध्यापकले एक समिति गठन गरेर विद्यार्थीको नम्बर तयार पार्नुपर्नेछ । विद्यालयहरूबाट प्राप्त भएको प्राप्ताङ्क विवरण र मूल्यांकन समितिबाट प्रमाणित गरी पठाइएका प्राप्ताङ्क, तालिका भिडाई प्रयोगात्मक र सैद्धान्तिक अंक भरे नभरेको, पूर्णाङ्क मिले नमिलेको लगायत रूजु गरेर जिल्लास्थित समन्वय इकाइलाई असार ३० गतेभित्र परीक्षा नियन्त्रण कार्यालयमा पठाउन बोर्डले आग्रह गरेको छ।

गत जेठ २८ गते बसेको मन्त्रिपरिषद बैठकले कोरोना महामारीका कारण एसइई परीक्षा सम्भव नरहेकोले आन्तरिक मूल्यांकनबाट परीक्षाफल प्रकाशित गर्ने निर्णय गरेको थियो।

गएको बर्ष एसईईका लागि चार लाख ८२ हजार विद्यार्थीले फारम भरेका थिए । तर परीक्षा शुरु हुनु अघिल्लो दिन कोरोनाका कारण सरकारले स्थगित गरेको थियो ।