ओलीको अभिव्यक्तिपछि नेकपामा खैलाबैला ! स्थायी समिति बैठक प्रभावित

१६ असार, काठमाडौं । प्रधानमन्त्री केपी शर्मा ओलीले आफूलाई भारतले हटाउन खोजेको अभिव्यक्ति दिएपछि नेकपामा खैलाबैला भएको छ ।

मंगलबार बसेको स्थायी समिति बैठकको शुरुमै अर्का अध्यक्ष प्रचण्ड, बरिष्ठ नेता माधव नेपाल र झलनाथ खनालले भारतले हटाउन खोजेको अभिव्यक्ति कसरी आयो ? भन्दै गम्भिर छलफल गर्नुपर्ने बताएपछि नेकपामा खैलाबैला भएको हो ।

नेताहरुबीचमा यो विषयले विवाद सिर्जना भएपछि मंगलबारको स्थायी समिति बैठक समेत प्रभावित भएको छ । नेताहरुले चर्कोसँग यो कुरा उठाएपछि प्रधानमन्त्री ओलीले जवाफ दिन सकेका छैनन् । यसले नेताहरुबीच चर्को मतभेद समेत सिर्जना गरेको छ ।

ओली केही समयका लागि बाहिर निस्केपछि बैठक प्रभावित भएको हो । प्रधानमन्त्री ओलीले हिजो मदन भण्डारी फाउण्डेसनको कार्यक्रममा नेपालको नयाँ नक्सा जारी गरेपछि भारतले आफूलाई हटाउन खोजेको बताएका थिए ।

ओलीको सो अभिव्यक्तिको नेकपाभित्र मात्रै होइन, बाहिर सर्वसाधारणमा पनि चर्को आलोचना भइरहेको छ ।