सप्तरीमा आज एकैदिन २२ जनामा कोरोना संक्रमण, संक्रमित संख्या २४८ पुग्यो

◊ धीरुभाइ

१६ असार सप्तरी । आज एकैदिन सप्तरीमा २२ जनामा कोरोना संक्रमण भेटिएको छ । पछिल्लो पटक थपिएको २२ जनासहित जिल्लामा संक्रमितको संख्या २४८ पुगेको छ ।  आज जिल्लामा समुदाय स्तरमा कोरोना भेटिएको स्वास्थ्य कार्यालय सप्तरीका निमित प्रमुख दुनियालाल यादवले दिए ।

कोरोना भेटिएकामध्ये जिल्लाको अग्निसाईर कृष्णसवरण गाउँपालिकाका १२ वर्षीय पुरुषमा छरछिमेक अन्य संक्रमित व्यक्तिबाट संक्रमण भएको उनले भने, संक्रमितको दाईमा पनि कोरोनाको लक्षण देखिएको छ । स्वाब जाँचको प्रक्रिया अगाडी बढाएका छौ । उनको अवस्था सामान्य भन्दा फरक छ ।

भेटिएका सक्रमितहरु तिलाठी कोइलाडी गाउँपालिकाका १० जना रहेका छन । उनीहरु १२ वर्ष माथिदेखि ५४ वर्षमुनिको रहेको बताइएको छ । त्यस्तै महदेवा गाउँपालिकाका एक महिलासहित १० जनामा कोरोना पुष्टि भएको र उनीहरु सात महिनादेखि ५४ वर्षमुनिका रहेको स्वास्थ्य कार्यालयका निमित प्रमुख यादवले बताए । यसैगरी राजगढ गाउँपालिका वार्ड नम्बर ६ मा एक जना २१ वर्षको पुरुषमा कोरोना संक्रमण पुष्टि भएको बताए ।

उनीहरुको राजविराज स्थित गजेन्द्र नारायण सिंह अस्पतालमा गरिएको स्वाब परिक्षणमा रिपोर्ट पोजेटिभ आएको बताए । अग्निसाइर बाहेकका संक्रमितहरु सम्बन्धित स्थानीय तहले सञ्चालन गरेको क्वारेन्टाइनमा रहेको र आइसोलेसनमा ल्याउने तयारी भइरहेको बताए ।

हिजो सोमबार साँझ पनि १७ जनामा कोरोना पुष्टि भएको थियो । जिल्लाको तिलाठी कोइलाडी गाउँपालिकामा १५, रुपनी गाउँपालिका र महदेवा गाउँपालिकामा एक-एक जनामा संक्रमण पुष्टि भएको थियो । तीमध्ये १५ जनाको गजेन्द्र नारायण सिंह अस्पताल राजविराज र दुई जनाको कोसी अञ्चल अस्पताल बिराटनगरको प्रयोगशालामा स्वाब परीक्षण गरिएको थियो ।

थपिएका संक्रमितसहित हालसम्म जिल्लाको हनुमाननगर कंकालिनी नगरपालिकामा ३८ जना, बलान बिहुल गाउँपालिका ३४, बोदेबर्साइन नगरपालिकामा ३४, छिन्नमस्ता गाउँपालिकामा २३ जना संक्रमित रहेको स्वास्थ्य कार्यालय सप्तरीका निमित प्रमुख यादवले बताए ।

यसैगरी राजगढ गाउँपालिकामा १९, तिलाठी कोइलाडी गाउँपालिकामा ४२, राजविराज नगरपालिकामा १५, डाक्नेश्वरी नगरपालिकामा १२, तिरहुत गाउँपालिकामा चार, सुरुङ्गा नगरपालिकामा तीन, महदेवा गाउँपालिका १२, जना कोरोना संक्रमित भेटिएको स्वास्थ्य कार्यालय निमित प्रमुख यादवले जानकारी दिए ।

त्यसैगरी सप्तकोशी नगरपालिका, कञ्चनरुप नगरपालिका, खडक नगरपालिका, अग्नीसाइर कृष्णासवरण गाउँपालिकामा दुई-दुई जना, शम्भुनाथ नगरपालिका, विष्णुपुर गाउँपालिका र रुपनी गाउँपालिकामा एक-एक जना कोरोना संक्रमित फेला परेका छन् ।