राजीनामा नदिन र खुट्टा पनि नकमाउन ओलीलाई गुटका नेताहरुको ढाडस !

१७ असार, काठमाडौं । १७ स्थायी समिति सदस्यले राजीनामा माग गरेपछि आफ्ना गुटका नेताहरुलाई बालुवाटार बोलाएर प्रधानमन्त्री केपी शर्मा ओलीले सुझाव लिएका छन ।

मंगलबार दिउँसो नेकपाका अध्यक्ष प्रचण्ड, वरिष्ठ नेताहरु माधवकुमार नेपाल, झलनाथ खनाल लगायत १७ नेताहरुले ओलीलाई दुवै पदबाट राजीनामा दिन दबाब दिएपछि उनले बिहानै आफ्नो गुटका नेताहरुलाई बालुवाटार बोलाएर छलफल तथा परामर्श गरेका हुन ।

जवाफमा गुटका नेताहरुले ओलीलाई अहिल्यै खुट्टा नकमाउन, तत्काल राजीनामा नदिन र केही समय धैर्य गरेर सोच्न सुझाव दिएका छन ।

बालुवाटारमा ओलीको गुट बैठकमा सहभागी भएका एक नेताले भने, अहिले न प्रधानमन्त्री पद छाड्नुपर्छ, न पार्टी अध्यक्षबाट राजीनामा दिनुपर्छ । खाली सबैका कुरा सुन्ने हो । निर्णय आफूले गर्ने हो । यसरी आत्तिएर अहिल्यै खुट्टा कमाउन जरुरी छैन ।

भेलामा मन्त्रीहरु ईश्वर पोखरेल, घनश्याम भुसाल, योगेश भट्टराई लगायतका नेताहरु सहभागी थिएन । साथै ओली निकट स्थायी समिति सदस्य, संसदीय दलका उपनेता सुवास नेम्वाङ पनि सहभागी थिए । गुटका नेताहरुको ढाडसपछि ओली केही शान्त बनेका छन ।