अलपत्र नेपालीको उद्धारमा खटिएका पाइलटमा कोरोनाको पुष्टि

१७ असार, काठमाडौं । विदेशमा अलपत्र नेपालीको उद्धारमा खटिएका एकजना पाइलटमा कोरोना संक्रमणको पुष्टि भएकाे छ । हिमालय एयरलाइन्सका पाइलटमा संक्रमण पुष्टि भएको हो । संक्रमण पुष्टि हुने पाइलट मेक्सिकन नागरिक भएको एयरलाइन्सले जानकारी दिएको छ ।

उनलाई सशस्त्र प्रहरीको बलम्बुस्थित अस्पतालको आइसोलेसनमा राखिएको छ । उनको स्वास्थ्य अवस्था सामान्य रहेको बताइएको छ । उनीसँगै उडेका अन्य चालक दलका सदस्यको भने पीसीआर रिपोर्ट नेगेटिभ आएको छ ।

असार दुई गतेदेखि हिमालय एयरलाइन्सले विदेशमा अलपत्र नेपालीको उद्दार गर्दै आएको छ । अहिलेसम्म ४० वटा उद्दार उडान गरिसकेको एयरलाइन्सले जानकारी दिएको छ ।