‘सन्नाटा’काबीच नेकपाको स्थायी कमिटी बैठक शुरु

१७ असार, काठमाडौं । प्रधानमन्त्री केपी शर्मा ओलीको राजीनामाको माग चर्केर शीर्ष नेताहरुबीचमा सन्नाटा छाएका बेला नेकपाको स्थायी कमिटी बैठक बालुवाटारमा शुरु भएको छ । बालुवाटारमा निर्धारित समयभन्दा झण्डै डेढ घण्टा ढिलो स्थायी कमिटीको पाँचौ दिनको बैठक शुरु भएको प्रधानमन्त्रीका प्रेस सल्लाहकार सुर्य थापाले जानकारी दिए ।

हिजो बोल्ने १७ जना स्थायी समिति सदस्यले प्रधानमन्त्री केपी शर्मा ओलीको राजीनामा माग गरेका थिए । भारतले आफूलाई प्रधानमन्त्री पदबाट हटाउन खोजेको भन्दै सार्वजनिक अभिव्यक्ति दिएपछि प्रधानमन्त्री ओलीको राजीनामा चर्कोसँग उठेको हो ।

यो विषयले नेकपाभित्र मात्रै होइन, बाहिर पनि त्यत्तिकै आलोचनाको ठाउँ पाएको छ । यद्यपी नेताहरुबीच मिल्नुको विकल्प नभएको भन्दै वार्ता र छलफलको माध्यमबाट असन्तुष्टि समाधान गर्नुपर्ने शीर्ष नेताहरुलाई नेकपाका नेता कार्यकर्ताको सुझाव छ ।

यसअघि हिजो निकै उत्कर्षमा पुगेको नेकपाको विवाद आज केही मत्थर हुने सम्भावना पनि छ ।