बजेट अधिवेशन अन्त्य : कांग्रेसको आपत्ति, सभामुख बेखबर !

१८ असार, काठमाडौं । सभामुख, प्रतिपक्षी र सत्ता साझेदारसँग छलफल नगरी बजेट अधिवेशन अन्त्य गरिएकोबारे प्रमुख प्रतिपक्षी दल नेपाली कांग्रेसले आपत्ति जनाएको छ । मन्त्रिपरिषद बैठकले अचानक बजेट अधिवेशन अन्त्य गर्नेबारे निर्णय गरेर राष्ट्रपतिसमक्ष सिफारिस गरेको थियो ।

मन्त्रिपरिषद बैठकको सिफारिस सदर गर्दै राष्ट्रपति विद्यादेवी भण्डारीले संसद सचिवालयलाई पत्र लेखेकी छन । यसबारे सभामुख अग्नि सापकोटा र राष्ट्रियसभाका अध्यक्ष गणेशप्रसाद तिमिल्सिना पनि असन्तुष्ट छन । कुनै छलफल र परामर्श नै नगरी संसद अधिवेशन अन्त्य गरेकामा दुबै जनाले असन्तुष्टि जनाएका हुन ।

यसअघि बजेट अधिवेशन शुरु गर्नेबारेमा सभामुले प्रधानमन्त्री ओलीसँग बालुवाटार पुगेर छलफल तथा परामर्श गरेका थिए । तर अचानक सत्ता संकट जोगाउन संसद अधिवेशन अन्त्य गरेपछि प्रम्ख विपक्षी कांग्रेस र सभामुख पनि असन्तुष्ट बनेका छन ।

केही विधेयक तत्कालै पारित गर्ने तयारी बढेका बेला अचानक राष्ट्रपतिबाट बजेट अधिवेशन अन्त्य गर्ने पत्र पाएपछि संसद सचिवालय पनि अलमल्ल परेको छ । संसद सचिवालयका महासचिव, सभामुख अग्नि सापकोटा, विज्ञ, राष्ट्रियसभाका अध्यक्ष गणेश तिमिल्सिना पनि प्रधानमन्त्रीको कदमबाट असन्तुष्ट बनेका छन ।