रोलरको कम्पनले पर्खाल भत्किदा च्यापिएर एक बालकको मृत्यु

◊ धीरुभाइ

१८ असार सप्तरी । रोलर मेसिनको कम्पनले पर्खाल भत्किदा च्यापिएर सप्तरीको खडक नगरपालिका वडा नम्बर १ सिस्वामा बिहीबार एक बालकको मृत्यु भएको छ । पर्खाल खस्दा च्यापिएर स्थानीय नखेलाल मण्डल धानुकको ७ वर्षीय बालक उमेशकुमार मण्डलको मृत्यु भएको इलाका प्रहरी कार्यालय कल्याणपुरले जनाएको छ ।

सडक निर्माणको लागि प्रयोग गरेको बा. २ क ९६८३ नम्बरको रोलरको (भाइब्रेटर) कम्पनले घरको पर्खाल भत्किएका हुन । खडक नगरपालिकाको नगरस्तरिय योजना अन्तर्गत रू. ३५ लाखको लागतमा स्थानीय फुलो मियाँको घर देखि पश्चिम लक्षमण साहको घरसम्म उपभोक्ता समिति मार्फत आरसीसी ढलान कार्यका भइरहेको थियो ।

उपभोक्ता समितिका अध्यक्ष छबिल मण्डल हुन । निर्माण स्थलमा उपभोक्ता समितिका पदाधिकारी थिएनन । उक्त सडकमा भाइब्रेटर मेसिन सञ्चालन भइरहेको बेला घरको १० ईन्च इटाँ माटोले बनेको घरको छेउमा बसेर बालक मण्डल काम हेरेर बसेको थियो । घरका सदस्यहरू खेतमा काम गरिरहेका थिए ।

चालकले भाइब्रेटर मेसिनको गति तीब्र पारेपछि घरको पर्खाल बालकको जिउमै खस्यो स्थानीय श्रवण कुमार साहले भने, तर कसैलाई थाहा भएन, आधा घण्टापछि भत्केको पर्खालको इटाँ जेसीवि हटाउन लाग्दा च्यापिएको अवस्था मृत बालक फेला प¥यो ।

पीडित परिवारसहित स्थानीयले उपभोक्ता समितिका पदाधिकारी, वडाध्यक्ष उपर कारबाहीको माग गरेका छन । यता रोलर मेसिनलाई पीडित परिवारसहित स्थानीयले नियन्त्रणमा लिई घटना स्थलमै कारबाहीको माग गर्दै प्रदर्शन गरिरहेको छ । चालक, उपभोक्ता समितिका पदाधिकारीहरु फरार रहेकोले खोजी कार्य भइरहेको प्रहरीले बताइएको छ ।