ओलीले नेकपा फुटाउन लागेको प्रचण्डको आरोप

१८ असार, काठमाडौं । सत्तारुढ नेकपाको विवाद उत्कर्षमा पुगेका बेला अध्यक्ष प्रचण्डले प्रधानमन्त्री केपी शर्मा ओली नै पार्टी फुटाउन अग्रसर रहेको आरोप लगाएका छन । आफूले एकता चाहेपनि ओलीले पार्टी फुटाउन चाहेको प्रचण्डको दाबी छ ।

ओली र राष्ट्रपति विद्यादेवी भण्डारीलाई भेटेर स्थायी कमिटी बैठकलाई सम्बोधन गर्दै प्रचण्डले ओली पद जोगाउनका लागि पार्टी फुटाउन लागि परेको बताएका हुन । संसदको अधिवेशन अन्त्य नगर्न, स्थायी कमिटी बैठकमा उपस्थित हुन र तत्काल अध्यादेश नल्याउन आग्रह गरेपनि ओलीले बेवास्ता गरेर पार्टी फुटाउन खोजेको प्रचण्डको भनाई छ ।

अध्यादेश ल्याएर पार्टी फुटाउनै लागेका ओलीलाई रोक्ने प्रयास भइरहेको र आफूहरु एकताबाट नभाग्ने ओलीको भनाई छ । तर पछिल्लो छलफल र ओलीको व्यवहारले पार्टी एक हुन कठिन देखिएको प्रचण्ड बताउँछन ।

बिना जानकारी संसद अधिवेशन अन्त्य गराउनु पार्टी फुटाउने ओलीको पहिलो कदम भएको पनि प्रचण्डको दाबी छ ।