क्वारेन्टाइनबाट भागेर घर गएका ३३ जनामा कोरोनाको पुष्टि, कन्ट्याक ट्रेसिङ सुरू

१८ असार, धनगढी । सुदूरपश्चिम प्रदेशमा क्वारेन्टाइनबाट भागेर घर गएका ३३ जनामा कोरोना भाइरस संक्रमणको पुष्टि भएको छ । कैलालीको गोदावरी नगरपालिका–११ ओलानीका ३३ जनामा सक्रमणको पुष्टि भएको हो ।

भारतबाट आएकामध्ये आरडीटी पोजेटिभ देखिएका ७० जनालाई वडा नम्बर ११ को सरस्वती माद्यामिक विद्यालयको क्वारेन्टाइनमा राखिएको थियो । उनीहरूको ४ असारमा स्वाब संकलन गरिएको थियो । तर लामो समयसम्म पनि रिर्पोट नआएको भन्दै ५९ जना क्वारेन्टाइनबाट भागेर घर गएका थिए ।

नगरपालिकाको स्वास्थ्य शाखाका प्रमुख वीरबहादुर कुँवरका अनुसार संक्रमितहरु भागेकै केहीमा रिर्पोट आएको छ जसमा ७० मध्ये ४२ जनामा संक्रमणको पुष्टि भएको छ । संक्रमित ४२ मा भागेर घर गएका ३३ जना पनि छन् ।

अब उनीहरुको कन्ट्याक ट्रेसिङ थालिएको छ । यता नगरपालिकाले क्वारेन्टाइनबाट घर गएकाहरूलाई घरमै सुरक्षित बस्न वा पुनः क्वारेन्टाइनमा फर्किन सुझाव दिएको छ ।