फेसबुकमा दोहोरी खेल्नुको साटो कलाकार संघमार्फत समाधान खोज्न आग्रह

१८ असार, काठमाडौं । पछिल्लो समय सामाजिक सञ्जाल फेसबुक लगायत सामाजिक सञ्जालमा कलाकारहरुबीच आरोप प्रत्यारोप भइरहेको गतिविधिप्रति नेपाल चलचित्र कलाकार संघले गम्भिर ध्यानाकर्षण भइरहेको जनाएको छ ।

नायक भुवन केसी र नायिका साम्राज्ञी राज्यलक्ष्मी शाह, नायिका पूजा शर्माको अन्तर्वार्ता विवाद, नायिका दीपाश्री निरौलाले महानायक राजेश हमाललाई लगाएको आरोप लगायतका विषयमा संघले आफ्नो गम्भिर ध्यानाकर्षण भएको जनाएको हो ।

यस्तो विवाद आउँदा सामाजिक सञ्जालमा दोहोरी खेल्नुको साटो कलाकार संघमा आएर समाधान खोज्न र संघ त्यस्ता विवाद समाधानका लागि अग्रसर हुने अध्यक्ष रवीन्द्र खड्काद्धारा जारी विज्ञप्तीमा उल्लेख छ ।

‘नेपाल चलचित्र कलाकार संघ चलचित्र कलाकारहरुको वर्गिय हक हितका साथै चलचित्रको संरक्षण सम्वद्र्धनमा स्थापना भएको संस्था हो । नेपाल चलचित्र कलाकार संघ स्थापना कालदेखि नै कलाकारकहरुको उत्थान, हित र चलचित्रको प्रवद्र्धनमा क्रियाशिल छ’ विज्ञप्तीमा भनिएको छ, ‘संघको जानकारीमा आएका र निवेदन परेका कलाकारका विभिन्न समस्यालाई संघले संवोधन गर्दै सामाधान गर्दै आइरहेको छ ।’

साथै संघले कोरोना महामारीका कारण ठप्प भएको चलचित्र क्षेत्रको अवस्थालाई आगामी दिनमा उकास्ने विषयमा पनि बहस शुरुवात गर्न आग्रह गरेको छ । पछिल्ला विवाद पनि लकडाउनकै कारण उत्पन्न भएका र यसले उत्पन्न भएका समस्या जानकारी गराएर विवाद समाधान गर्न पनि संघले आग्रह गरेको छ । साथै विवादित विषयमा समाधानका लागि संघले पहल शुरु गरेको पनि विज्ञप्तीमा उल्लेख छ ।

‘हाल केही चलचित्र कलाकारहरुको आपसी विवाद र आक्षेप संन्र्दभमा पनि संघले प्रचारमा आएका सबै कलाकारहरु संग सम्पर्क गरेको छ । वार्ताद्वारा समस्या समाधान गर्न आव्हान पनि गरेको छ’ विज्ञप्तीमा भनिएको छ ।

लकडाउनका कारण उत्पन्न समस्या एवं पारिश्रमिकका विवादलाई पनि समाधान गर्न आवश्यक रहेको र त्यस्ता कुरा संघलाई जानकारी गराएर संयुक्त रुपमा विवाद समाधान गर्न पनि संघले आग्रह गरेको छ ।