शीतलनिवासमा प्रचण्ड, ओलीसँग फेरि झुके !

१९ असार, काठमाडौं । बालुवाटारमा प्रधानमन्त्री केपी शर्मा ओलीसँग तीन घण्टा छलफल गरेका नेकपा अध्यक्ष पुष्पकमल दाहाल प्रचण्ड शीतलनिवास पुगेका छन । ओलीसँगको निर्णायक वार्ता पनि निष्कर्षविहिन भएपछि प्रचण्ड राष्ट्रपति विद्यादेवी भण्डारीलाई भेट्न शीतलनिवास पुगेका हुन ।

बालुवाटारमा ओलीसँगको वार्ता आफ्नो पक्षमा नभएपछि विवाद समाधानका लागि मध्यस्तता गरिरहेकी राष्ट्रपति भण्डारीलाई भेट्न प्रचण्ड शीतलनिवास पुगेको नेताहरुले बताएका छन । ओली र प्रचण्डको विवादमा जहिल्यै राष्ट्रपति भण्डारी बीचमा बसेर मध्यस्तता गर्ने गरेकी छन ।

यसअघि अध्यादेश ल्याउँदा पनि प्रचण्ड शीतलनिवासमै बसेर ओलीसँग झुक्न बाध्य भएका थिए । जबर्जस्ती ल्याएको दल विभाजनसम्बन्धि अध्यादेश फिर्ता गराएपनि प्रधानमन्त्री ओलीलाई पदबाट राजीनामा गराउन प्रचण्ड असफल भएका थिए ।

यसपटक पनि ओलीलाई प्रधानमन्त्री र पार्टी अध्यक्ष पदबाट राजीनामा गराउन भरमग्दुर प्रयास गरेका प्रचण्ड सफल हुने संकेत देखिएको छैन । ओलीले आफूमाथि आउन सक्ने सम्भावित खतरा मानिएको संसदको बजेट अधिवेशन नै अन्त्य गरिदिएका छन । जसले पार्टीको निर्णय नमाने प्रधानमन्त्री ओलीविरुद्ध अविश्वासको प्रस्ताव ल्याउने प्रचण्डको योजना पनि सफल भएन ।

यसपटक पनि ओलीले प्रधानमन्त्री र पार्टी अध्यक्ष पदबाट राजीनामा दिने छाँट देखाएका छैनन् । पार्टीको स्थायी कमिटी बैठकमा प्रधानमन्त्रीको राजीना माग्ने सदस्यको बहुमत पु¥याएका प्रचण्ड ओलीका सामु फेरि निरीह देखिएका छन ।

ओलीको अडान बुझेर शीतलनिवास पुगेका प्रचण्ड फेरि राजनीतिक सहमति गरी झुक्ने संकेत देखिएको नेताहरुले बताएका छन । ओलीले बरु अध्यादेश ल्याएर पार्टी फुटाउने तर पार्टी अध्यक्ष र प्रधानमन्त्री पदबाट राजीनामा नदिने अडान दोहो¥याएपछि प्रचण्ड नै झुक्नुपर्ने अवस्था सिर्जना भएको हो ।