निजी विद्यालयबाट शुल्क नउठाउन प्याब्सनको आग्रह

१९ असार, काठमाडौं । पछिल्लो समय निजी विद्यालयको शुल्क विवाद बढेपछि सञ्चालकहरुको संस्था निजी तथा आवासीय विद्यालय अर्गनाइजेसन प्याब्सनले नयाँ सर्कुलेसन जारी गरेको छ । अनावश्यक रुपमा शुल्क लिन थालेपछि प्याब्सनले जथाभावी शुल्क नउठाउन मातहतका विद्यालयलाई निर्देशन जारी गरेको हो ।

प्याब्सन अध्यक्ष टीकाराम पुरीले सरकारको नीति विपरित शुल्क उठाए कारबाही भोग्नुपर्ने भन्दै सीमामा रहेर स्पष्ट कारण खुलाएर मात्रै शुल्क उठाउन भनेका हुन । सरकारसँग संवाद गर्ने काम भइरहेकाले अब चाँडै शुल्कको विवाद सकिने गरी समाधान हुने पनि उनले विश्वास व्यक्त गरे ।

साथै प्याब्सनले सरकारले आफूहरूको माग पूरा नगरे पठनपाठन ठप्प पार्ने चेतावनी दिएको छ । भर्चुअल कक्षामार्फत पठनपाठन भइरहेको भन्दै प्याब्सन अध्यक्ष पुरीले सरकारले माग पूरा नगरे अनलाईन कक्षा पनि बन्द गर्ने चेतावनी दिएका हुन ।

यसअघि पनि निजी विद्यालयले पटक पटक शुल्क उठाउन खोज्दा सरकारले नउठाउन भन्दै आएको र वार्तामार्फत समस्या समाधान गर्ने बताएको थियो ।